Հռոմի պապի այցն Իրան կաջակցի տարածաշրջանի բոլոր քրիստոնյաների

Հռոմի Ֆրանցիսկոս պապի այցն Իրան աջակցություն կլինի տարածաշրջանի բոլոր քրիստոնյաների համար: Այս մասին իտալական «Il Fatto Quotidiano»պարբերականին տված հարցազրույցում հայտարարել է իրանցի խոշոր գործարար Մեհդի Ֆիրուզանը, որն ուղեկցել է ԻԻՀ նախագահ Հասան Ռոուհանիին Իտալիա կատարած այցի ժամանակ: Ֆիրուզանը ոչ միայն իրանական ազդեցիկ ընտանիքից է, նա նաեւ ազգակցական կապ ունի Լիբանանի իմամ Մուսա Սադրի հետ: Վերջինը շիա աշխարհի ամենից ազդեցիկ առաջնորդներից է, որը 1978 թվականին անհետ կորել է Լիբիայում: «Մենք շնորհակալ ենք Իտալիային, քանի որ Հռոմը երբեք մեզ չի լքել: Իտալիան միշտ միջնորդ է հանդիսացել Իրանի եւ Եվրոպայի միջեւ: Երբ նավթային արդյունաբերությունն ազգայնացվեց, ոչ ոք չէր ցանկանում խոսել մեզ հետ՝ բացի Իտալիայից»,- հայտարարել է Ֆիրուզանը: Նա նշել է, որ Իրանում երկրի համար կարեւոր քրիստոնյա համայնք է բնակվում, քրիստոնյաներ կան նաեւ խորհրդարանում: Եվ Հռոմի պապի այցը աջակցություն կլինի տարածաշրջանի բոլոր քրիստոնյաների համար, որոնց, մահմեդականների հետ միասին, սպանում են ԻԼԻՊ-ի ահաբեկիչերը: «Եվ հավատացեք, եթե միջազգային հանրությունը ցանկանում է հաղթել այդ մարդասպաններին, պետք է հայացքն ուղղի դեպի Իրան, քանի որ մենք միակ կայուն երկիրն ենք այս հսկայական տարածքում: Եթե Եվրոպան մատնացույց անի Իրանին եւ Ռոուհանիին, կկարողանա խաղաղության եւ երկխոսության նոր կարգ սահմանել: Դա նոր փուլ կբացի մեր սեփական երկրի պատմության մեջ մարդու իրավունքների հարգման առումով»,- ասել է նա: