«Իսկանդերից» երեք խոշոր հարց է առաջանում». Անուշ Սեդրակյան. տեսանյութ

«Եթե վերցնենք Հայաստանի նախկին երկու վարչապետների ելույթները՝ երկրում տիրող իրավիճակի վերաբերյալ, ապա դրանք, ասես, մեկը մյուսի կրկնությունը լինեն»,- այս մասին Հայելի ակումբում ասաց «Ազատ դեմոկրատներ» կուսակցության փոխնախագահ Անուշ Սեդրակյանը՝ հավելելով, որ քանի դեռ կոռուպցիայի դեմ պայքարը զուտ անձերի տեղափոխման, տեղաբաշխման կամ նախարարությունների վերանվանման ուղով է ընթանում, այլ ոչ թե փոխում իր բնույթը, ուզում ես՝ հազար անգամ անուն փոխիր, դրանից ոչինչ չի փոխվելու մեր երկրում: «Փոփոխություն չի լինի, քանի դեռ իշխանությունը հաշվետվություն չի տվել իր նախկին սխալների համար։ Նոր վարչապետն ասել է, որ պետք է դադարեցնել պրիմիտիվ գողությունը, բայց պետք է դադարեցնել ոչ միայն՝ պրիմիտիվ գողությունը, այլ նաև՝ շատ բարձր մակարդակի բարդ և սխեմավորված գողությունը։ Այդ գողության ամբողջ գործընթացը պետք է դարձնել թափանցիկ, այլապես Հայաստանի բոլոր ռեֆորմները կմնան այս արատավոր շրջանակի ընթացքում»,-ընդգծեց տիկին Սեդրակյանը: Անդրադառնալով ՀՀ Անկախության 25-ամյակի զորահանդեսին, որտեղ ներկայացվեց «Իսկանդերը», բանախոսը նշեց, որ դրանից հետո 3 խոշոր հարց է առաջանում: Լուսինե Միքաելյան