Կրիմնալ էլ կա, կրիմնալ էլ

Սեւանում ընտրական գործընթացներն անկառավարելի են դառնում։ Քիչ առաջ լրատվամիջոցները հայտնեցին գործող քաղաքապետ ու թեկնածու Ռուդիկ Ղուկասյանի՝ Ուդո մականվամբ, բերման ենթարկելու մասին։ Ղուկասյանին հարցաքննել են մի քրեական գործի շրջանակով, որը հարուցվել է ստորգետնյա խողովակները յուրացնելու փաստով։ Այս գործի մասին վերջերս ակնարկել էր նաեւ Գեղարքունիքի մարզպետ Ռաֆիկ Գրիգորյանը, նա եւ Սեւանի քաղաքապետը գրեթե թշնամական հարաբերությունների մեջ են։ Տեղեկություններ են սփռվում, որ մարպետը պատվի հարց է համարում Ուդոյի չընտրվելը։ «Շոու ա, որը կազմակերպում ա Սևանի ոստիկանապետը, Աղեկյանը: Էդ շոուն կազմակերպել ա ինքը, խողովակները տարել ա, հանել ա, ես տեղյակ չեմ ոչ մի բանից: Ես հիմա եկել եմ բաժին, քննիչը արձանագրությունը կազմում ա, գնում եմ տուն: Շոու ա կազմակերպել, որ պիտի գան 4 հոգով գործող քաղաքապետին աշխատավայրից տանեն: Ինքնը նորից պրովակացիա ա անելու, էս չլինի, ուրիշ բան ա անելու»,-Tert.am-ի հետ զրույցում բերման ենթարկելուն է անդրադարձել գործող քաղաքապետը: Նա չի ընդունում մեղքը, ասում է, որ անգամ իր դեմ մեղադրանք էլ չկա։ «Ինձ մեղադրանք չեն առաջադրել, ինձ վկա են կանչել, ուզում են մեղավոր հանել իմ ճարտարապետին, բայց չեն կարող, քանի որ ինքն ա արել դա: Ամեն ինչ օրինական ա, ինքը ուղղակի ասել ա՝ տարեք, տարել են: Սա շոու ա Սևանի ոստիկանապետի կատարմամբ: Դուք իրեն հարցրեք, ընկեր ոստիկանապետ, քաղաքային զբոսայգու խաղերը, ավտոդրոմի մեքենաները ո՞ւր են, որ տարել էիք բաժին: Դրա պատասխանը ստանալու ա հոկտեմբերի 2-ին: Մտնում ա բոլորի գրպանը, դրա համար էդ բաները անում ա» ասել է նա։ Գործողությունների նման ընթացքը ուշագրավ է այսօրվա «Հրապարակ» օրաթերթի տեղեկությունն այն մասին, որ Սեւանի ընտրություններն այնքան թեժ են, որ խառնվել է Ոստիկանապետ Վովա Գասպարյանը։ Նախորդ ընտրություններին Գասպարյանը աշխատել է Ուդոյի օգտին, այս անգամ, ըստ թերթի, մարզպետի թեկնածու Սարգիս Մուրադյանի համար է աշխատանքներ տանում։ Գաղտնիք չէ, ոչ Սեւանի գործող քաղաքապետ Ռուդիկ Ղուկասյանը մեծ ազդեցություն ունի ոչ միայն քաղաքում, այլեւ ողջ մարզում, նա սերտ կապեր ունի տեղի քրեական տարրերի հետ, իսկ անցած ընտրություններին նրա թեկնածությունն առաջ էր տարել նախկին վարչապետ Հովիկ Աբրահամյանը։ Եւ ահա, ակնհայտ է դառնում, թե ինչով է պայմանավորված Ղուկասյանի դեմ սկսած արշավը։Անառարկեի է, ինչ խոսք, որ Ուդոն եւ նրա նմանները չպետք է տեղ գտնեն իշխանության ղեկավար օղակներում, սակայն , ինչու է այդ հարցն օրակարգ բերվում հենց հիմա։ Ինչու, ասենք իշխանությունը ընթացք չէր տալիս Ուդոյի «ապօրինություններին» ու դրանց մասին հիշել է հիմա։ Պարզից էլ պարզ է, որ այս խմորումները պայմանավորված են ներիշխանական խնդիրներով եւ Ուդոն անցանկալի է դարձել՝ միայն այն պատճառով, որ Հովիկ Աբրահամյանի «մարդն» է, ով այսօր այսպես ասած դուրս է մղվել ներիշխանական ակտիվ գործընթացներին։ Եթե Ուդոյից հրաժարվելու գլխավոր պատճառը նրա կրիմինալ համբավն է, ապա իշխանությունը լայնամասշտաբ որս պիտի սկսի սեփական թիմակիցների նկատմամբ։ Բայց ահա, ընդամենը օրեր առաջ Էջմիածնում նույն բռնի՝ ծեծ ու ջարդի, անգամ կրակոցների գնով քաղաքապետի պաշտոնին տիրացավ գեներալ Մանվել Գրիգորյանի որդին, որը հոր արժեհամակարգի անշեղորեն կրողն է։ Մասիս քաղաքում էլ ոստիկանապետի թիկնազորի պետ Արշակ Հակոբյանի փեսա Դավիթ Համբարձումյանի համար արշավանքներ կազմակերպվեցին եւ պայքարից դուրս մղվեց ԲՀԿ-ական Կարապետ Օհանյանը։ Մարդը ողջ առողջ առաջադրվել էր, բայց մի քանի օր հետո պարզվեց, որ նա վատառողջ է ու չի կարող շարունակել պայքարը, բայց բոլորն էին խոսում նրա անհետացման ու իր դեմ կիրառված ճնշումների մասին։ Կամ օրինակ անցած անգամ Գորիսի ընտրապայքարից դուրս եկավ դաշնակցական Արթուր Աթայանը, նա հայտարարեց, որ ամենազոր մարզպետ Սուրիկ Խաչատրյանի կողմից ճնշումներ կան իր եւ իր թիմի նկատմամբ։ Փաստորեն, կրիմինալ էլ, կա, կրիմնալ էլ, իշխանությունն ինքն է որոշում, որն է իր ուզածը։ Անի Սահակյան