Freedom Housе-ի պատասխանը՝ կազմակերպության՝ «հայամետ» լինելու Ալիևի հայտարարությանը

Freedom House միջազգային իրավապաշտպան կազմակերպությունը մեկնաբանել է սեպտեմբերի 20-ին Եվրախորհրդարանի ներկայացուցիչների հետ հանդիպման ժամանակ Ադրբեջանի նախագահ Իլհամ Ալիևի հնչեցրած հայտարարություններն իր հասցեին, գրում է contact.az-ը: Freedom House-ի գործող նախագահ Դենիել Կալինգաերտն իր հայտարարությունում խիստ քննադատության է ենթարկել Իլհամ Ալիևի կառավարությանը: Ի պատասխան՝ կազմակերպության գործող նախագահ Դանիել Քալինգաերտը խիստ քննադատության է ենթարկել Ալիևին և նրա կառավարությանը՝ ասելով. «Նախագահ Իլհամ Ալիևը վերջին 10 տարիներին ձևավորված քաղաքացիական հասարակության և քաղաքական ընդդիմության ակտիվիստների ձերբակալությունների ավանդույթի, ինչպես նաև մարդու իրավունքների սարսափեցնող իրավիճակի պատասխանատու դեմքն է։ Իսկ Freedom House-ը կշարունակի իր ջանքերը, որպեսզի հանրության ուշադրությունը գրավի Ալիևի կառավարության խախտումների և մարդու իրավունքների ոտնահարման դեպքերի վրա»։ Իլհամ Ալիևը սեպտեմբերի 20-ին ԵՄ-Ադրբեջան միջխորհրդարանական համագործակցության պատվիրակության հետ հանդիպմանը մեղադրել է Freedom House-ին կողմնակալության համար: «Freedom House-ը հայամետ դիրքորոշում է ընդունել և մշտական հարձակումներ է գործում Ադրբեջանի վրա, այդ պատճառով մեր երկիրը ոչ մի կապ չունի այդ կազմակերպության հետ: Ես կասեմ, որ մեզ համար նշանակություն չունեն Freedom House-ի զեկույցները, և այդ փաստաթղթում այդ կազմակերպության հիշատակումն ինձ մոտ ափսոսանքի զգացողություն է առաջացնում»,- ասել է Ալիևը: