Արծվիկ Մինասյանն ընդդիմացավ

Էկոնոմիկայի նախարարի պաշտոնակատար Արծվիկ Մինասյանը կառավարության այսօրվա նիստում ընդդիմացավ վարչապետ Կարեն Կարապետյանի առաջարկին:Արծվիկ Մինասյանն առարկեց վարչապետի կատարած փոփոխությանը, որով էկոնոմիկայի նախարարությունը վերանվանվում է ներդրումների և ձեռնարկատիրությանն աջակցման նախարարություն: «Դե, բնականաբար, որպես էկոնոմիկայի նախարարի ժամանակավոր պաշտոնակատար, ինձ ցանկալի չէ «էկոնոմիկա» բառը հանելը, առավել ևս, որ ես էկոնոմիկան պատկերացնում եմ ավելի լայն, քան ներդրումներն են կամ ձեռնարկատիրությանն աջակցությունը: Ահա, թե ինչու, ընդունելով հանդերձ Ձեր կողմից կատարված շեշտադրումը, որ ներդրումներն ու ձեռնարկատիրությանն աջակցությունը պետք է առանձին ուղղություն լինեն, ինձ մտահոգում են մի քանի հարցեր, որոնք այսօր էկոնոմիկայի նախարարության տիրույթում են, բայց անվանման մեջ դրանք չեն երևում: Մասնավորապես` առևտրի հատվածը, արտաքին առևտուրը, որը ներդրումների հետ համարվում է մեր երկրի տնտեսության հիմնական շարժիչ ուժը: Գուցե այն այլ նախարարություն է գնալու կամ մնալու է, կխնդրեի, որ անվանման մեջ այդ շեշտադրումը լինի»,- ասաց նա: Նա նշեց, որ խոսքը, մասնավորապես, արտաքին առևտրի մասին է, որը ներդրումների հետ միասին համարվում է մեր տնտեսության հիմնական շարժիչ ուժը:«Այստեղ չի երևում անվանման մեջ, գուցե այլ նախարարությո՞ւն է գնալու, կխնդրեի, որպեսզի հետագայում շեշտադրումն անպայման լինի: Մենք ունենք ԵՏՄ, ունենք Եվրամիության հետ GSP+ առևտրային արտոնյալ ռեժիմ, այլ երկրների հետ ունենք ազատ առևտրի համաձայնագրեր, որոնք հատուկ քաղաքականության տեսակետից վերաբերմունքի պետք է արժանանան»,- նշեց Մինասյանը: Այնուհետև Արծվիկ Մինասյանն ասաց, որ չի ուզում ոլորտի նորանշանակ նախարարին թերագնահատել, բայց չպետք է ՏՏ ոլորտը դիտարկել զուտ ծառայությունների ոլորտ. «Կխնդրեմ, որ իմ գործընկերն այդ հարցին մեծ ուշադրություն դարձնի: Ինքը պետք է տարածվի տնտեսության բոլոր ճյուղերում հավելյալ արժեք ստեղծելու ուղղվածությամբ»: