Ադրբեջանը Հայաստանից ակնկալում է իրական բանակցությունների մեկնարկ. Մամեդյարով
«Ինտերֆաքս-Ադրբեջանի» փոխանցմամբ՝ Ադրբեջանի արտգործնախարար Էլմար Մամեդյարովը հայտարարել է, որ Լեռնային Ղարաբաղի հակամարտության կարգավորման հարցում ստատուս քվոյի պահպանումը ցանկացած պահի կարող է հանգեցնել լարվածության աճի: «Ապրիլյան բախումները ցույց տվեցին, որ ստատուս քվոյի պահպանումը վտանգ է ներկայացնում և կարող է հանգեցնել լարվածության աճի՝ անսպասելի արդյունքներով: Միջազգային հանրությունը չի ընդունում ստատուս քվոյի պահպանումը: Հայաստանը պետք է հասկանա, որ ստատուս քվոն պահպանելու ձգտումը շատ լուրջ սխալ է: Ադրբեջանը Հայաստանից ակնկալում է իրական բանակցությունների մեկնարկ՝ Ղարաբաղյան հակամարտության խաղաղ կարգավորման համար»,- հայտարարել է Ադրբեջանի արտգործնախարարը: Նրա խոսքով՝ ԻՀԿ-ն պետք է կոչ անի միջազգային հանրությանը, որ վերջինս ստիպի Հայաստանին կատարել իր միջազգային պարտավորությունները։ ԼՂ հարցով ԻՀԿ-ի կոնտակտային խումբը ստեղծվել է 2016թ. ապրիլին Ստամբուլում տեղի ունեցած ԻՀԿ երկրների 13-րդ գագաթաժողովի արդյունքներով: Դրա կազմի մեջ մտել են 7 երկրներ՝ Թուրքիան, Մարոկկոն, Սաուդյան Արաբիան, Պակիստանը, Մալայզիան, Գամբիան ու Ջիբութին:
Հետևեք մեզ Viber-ում
