Լավագույն ավանդույթները շարունակվում են

Սեպտեմբերի 18-ին Հայաստանի երեքհարյուրից ավելի համայնքներում ՏԻՄ ընտրությունները սպասվածի պես անցել են «հին ու բարի» մեթոդներով։ Նախընտրական ռազբորկաներ, սպառնալիքներ, ավանդական ընտրախախտումներ, եղավ ամեն ինչ՝ մինչև անգամ կրակոցներ և ծեծուջարդ Էջմիածնում, որտեղ քաղաքապետի պաշտոնում վերընտրվեց գեներալ Մանվելի որդին՝ Կարեն Գրիգորյանը, որին նրա մրցակիցը մեղադրում էր ծեծուջարդի համար, մրցակից թեկնածուն այժմ էլ հիվանդանոցում է, ամբողջությամբ կապտուկներով պատված, Գրիգորյանն էլ նրան մեղադրում էր իր մեքենայի վրա կրակելու համար:Սակայն Էջմիածնում պնդում են, որ այս պատմությունը բեմադրվել է Գրիգորյանների կողմից։ «Աննախադեպ» արդյունքներ են գրանցվել մեկ այլ ֆեոդալի տարածքում՝ Սյունիքում խոշորացված համայնքներում գրեթե առանց բացառությամբ հաղթել են մարզպետ Լիսկայի դրածոները։ Իհարկե, տասնյակ համայնքներում ՀՀԿ-ական գործող համայնքապետերը պարտություն են կրել, մոտավորեպս 80 համայնքում նրանք չեն վերընտրվել, սակայն այդ տեղերում հաղթանակ տանողները մեծամասամբ անկուսակցականներ են, ինչը ամենևին չի նշանակում ընդդիմության թեկնածու։ Կյանքը ցույց է տվել, որ այդ մարդիկ շատ կարճ ժամանակում ընդունում են ՀՀԿ-ի գերբը եւ խաղում իշխանության խաղի կանոններով։ Ու չի բացառվում, որ ՀՀԿ-ն նման դեպքերում ազատ է թողնում՝ ժողովրդավարության պատրանք ու իմիջ ձեւավորելու համար։ Եղել են նաեւ այլ բացառություններ, որտեղ ՀՀԿ-ականներին հաղթել են դաշնակցականներ, սակայն որպես կանոն այդ հաղթանակները գրանցվել են այն մարզերում, որոնց ղեկավարները ՀՅԴ-ականներ են, օրինակ Արագածոտնի մի շարք համայնքներում։ Մեծ հաշվով գործող գյուղապետերը մնացել են իրենց աթոռներին կառչած ու ընտրություններում ակտիվությունը հօգուտ իշխանական երկու կուսակցությունների է ՀՀԿ-ի ու ՀՅԴ-ի։ Չնայած ԲՀԿ-ական պատգամավոր Միքայել Մելքումյանը համարում է, որ իրենց կուսակցությունը ջախջախիչ հաղթանակներ է տարել այս ընտրություններում: ԲՀԿ-ն, Միքայել Մելքումյանի փոխանցմամբ թեկնածուներ է առաջադրել Արմավիրի, Արարատի, Արագածոտնի մարզերում։ եւ գրեթե բոլոր համայնքներում նրանց հույսերն ու ակնկալիքներն արդարացվել են։ Սակայն պատմությունը ցույց է տվել, որ ԲՀԿ-ական գործող համայքապետերը համապետական բոլոր ընտրություններին աշխատել են իշխանության համար։ Միակ բացառությունը թերեւս Արարատի մարզի Նոր կյանքն է, որտեղ գյուղապետի ընտրություններում հաղթել է ոչ թե իշխող Հանրապետական կուսակցության թեկնածուն, այլ ընդդիմության՝ Նիկոլ Փաշինյանի «Քաղաքացիական պայմանագրի» թեկնածու Գարիկ Սարգսյանը: Թվում է, թե իրեն միակ ընդդիմություն հռչակած քաղաքական ուժը պետք է մեծ թվով համայնքներում թեկնածուներ ունենար, սակայն ՔՊ-ն իր բոլոր ուժերը կենտրոնացրել էր միայն մեկ վայրում: Իհարկե, այս հաղթանակը մեծ հաշվով աննախադեպ էր՝ հաշվի առնելով, որ այդ մարզը գտնվում է երկու ազդեցիկ գերդաստանների ձեռքում՝ Աբրահամյանների ու Գրիգորյանների, այդուհանդերձ հանրապետության 317 համայնքում անցնող ընտրություններում առաջինը լինել միայն մեկ գյուղում եւ դա թմբկահարել, այնքան էլ ընկալելի չէ։ Սա անկասկած խորհրդարանական ընտրություններում հաջողության երաշխիք լինել չի կարող: Անի Սահակյան