ՏԻՄ ընտրությունները՝ մեկ լրահոսում. Pop-Up Newsroom

Մեդիա նախաձեռնությունների կենտրոնն առաջարկում է օգտագործել Pop-Up Newsroom ձևաչափը` Հայաստանի տարբեր համայնքներում ՏԻՄ ընտրություններին վերաբերող տեղեկատվությանը հետևելու համար: Pop-Up Newsroom-ը տեղեկությունների տարածման և ստացման ինտերակտիվ ձևաչափ է, որը հնարավորություն է տալիս կոնկրետ թեմայի շուրջ սոցիալական մեդիայում տարածված տարբեր նյութերը, հղումները, գրառումները հավաքել մեկ տեղում: ՄՆԿ-ի թիմն այդ օրերին կհետևի սոցիալական ցանցերում տարածվող լրահոսին և համապատասխան նյութերը կհավաքի #armlocalvoteհեշթեգի ներքո: Նախաձեռնությունը բաց է բոլորի համար: Եթե լուսաբանում եք ՏԻՄ ընտրությունները կամ հետևում եք դրանց, առաջարկում ենք տարածել ձեր հոդվածները, վիդեո կամ ֆոտո պատմությունները, դիտարկումներն ու կարծիքները Twitter, Facebook, Instagram սոցիալական հարթակներից մեկով՝ օգտագործելով #armlocalvote պիտակը (hashtag): Որքան շատ մարդ միանա, այնքան հեշտ որոնվող ու տեսանելի կդառնա թեմային վերաբերող տեղեկատվությունը սոցիալական ցանցերում: Սեպտերմբերի 18-ին և հոկտեմբերի 2-ին սոցիալական ցանցերում տեղական ընտրություններին վերաբերող գրառումներ անելիս օգտագործեք #armlocalvote պիտակը/հեշթեգը և ձեր տեղեկությունը կհայտնվի Pop-up Newsroom-ի լրահոսում: Հեշթեգը կարևոր է, որպեսզի ձեր պատմություններն ու գրառումները չկորչեն ինտերնետում և հայտնվեն ճիշտ պահին ճիշտ տեղում: Միաժամանակ նույն հեշթեգով կարող եք հետևել այդ օրերին սոցիալական ցանցերում հայտնված թեմային վերաբերող տեղեկատվությանը: 2015-ին մայիսի 17-ին, օրինակ, համայնքների խոշորացման հանրաքվեի մասին տեղեկությունները հավաքվեցին #խոշորացում15հեշթեգով սոցիալական մեդիայի լրահոսում: Ակնկալում ենք ինչպես լրագրողների ու լրատվամիջոցների, այնպես էլ՝ ընտրություններին մասնակցող քաղաքացիների և ընթացքին հետևող դիտորդների ու կազմակերպությունների մասնակցությունն ու համագործակցությունը: Միացեք մեր նախաձեռնությանը և օգտագործեք #armlocalvote հեշթեգը ձեր յուրաքանչյուր նոր գրառման հետ: Շնորհակալություն համագործակցության համար: Մեդիա նախաձեռնությունների կենտրոն