Վրաստանը տնտեսական ազատությունների մակարդակով 5-րդ տեղում է

Fraser Institute կանադական վերլուծական կենտրոնի գնահատականներով՝ Վրաստանը աշխարհի 159 երկրների շարքում տնտեսական ազատությունների մակարդակով 5-րդ տեղում է։ Այս մասին կառավարության նիստում հայտարարել է Վրաստանի վարչապետ Գեորգի Կվիրիկաշվիլին։ Նրա կարծիքով՝ կանադացի մասնագետները բարձր են գնահատել Վրաստանի իշխանությունների դրամավարկային քաղաքականությունը և մարդու իրավունքների պաշտպանությունը: Նախորդ տարի Վրաստանը 12-րդ տեղում էր։ «Համեմատության համար ցանկանում եմ ասել, որ 2015 թվականին մենք 12-րդ տեղում էինք, 2014 թվականին՝ 16-րդ տեղում, 2013 թվականին՝ 21-րդ տեղում, 2012 թվականին՝ 53-րդ տեղում։ Մենք մեծ առաջընթաց ենք գրանցել, որը պայմանավորված է այնպիսի ոլորտների զարգացմամբ, ինչպիսիք են ֆինանսների մատչելիությունը, սեփականության իրավունքի պաշտպանությունը»,- նշել է Վրաստանի վարչապետը։