ԱՄՆ-ն չի կարող
Միացյալ Նահանգները Սիրիայում դժվարությունների է բախվում, քանի որ չի կարողանում ընդդիմության «առողջ» մասին զատել կիսահանցավոր տարրերից: Ինչպես նշում է ria.ru-ն, այս մասին ասել է Ռուսաստանի Դաշնության նախագահ Վլադիմիր Պուտինը: Աղբյուրը մանրամասնում է, որ ուրբաթ երեկոյան պետք է Սիրիայի հարցով ՄԱԿ-ի Անվտանգության խորհրդի նիստ կայանար, որը, սակայն, չեղարկվել է ԱՄՆ-ի ու Ռուսաստանի նախաձեռնությամբ: ՄԱԿ-ում ՌԴ-ի մշտական ներկայացուցիչ Վիտալի Չուրկինը, լրագրողների հետ խոսելով այդ հանդիպման չեղարկման պատճառների մասին, հայտնել է, որ ԱՄՆ-ն դեռևս պատրաստ չէ ունեցած փաստաթղթերով կիսվել ԱԽ-ի անդամ երկրների հետ: «Մեր ամերիկացի գործընկերները միշտ և ամենուր հանդես են գալիս որպես բաց ու թափանցիկ գործընթացների աջակիցներ: Բայց ինձ չի զարմացնում այն փաստը, որ տվյալ պարագայում նրանք նահանջում են իրենց ունեցած դիրքորոշումից»,- ասել է Պուտինը լրագրողներին: Իր խոսքում ՌԴ նախագահը հավելել է, որ ԱՄՆ-ի նման պահվածքը պայմանավորված է այն փաստով, որ այդ երկրի իշխանությունները չեն կարողանում Սիրիայի ընդդիմության «առողջ» մասին զատել կիսահանցավոր և ահաբեկչական տարրերից: «Իմ կարծիքով՝ դա պայմանավորված է Սիրիայի նախագահ Բաշար ալ Ասադի կառավարության դեմ պայքարում մարտական ներուժը պահպանելու ցանկությամբ: Մինչդեռ դա շատ վտանգավոր ճանապարհ է, և մենք այդ մասին բազմիցս ենք նշել: Սակայն, թվում է, որ մեր ամերիկացի գործընկերները կրկին թույլ են տալիս նախկինում արած նույն սխալները: Դա զարգացման վտանգավոր ճանապարհ է»,- եզրափակել է Պուտինը:
Հետևեք մեզ Viber-ում
