Սնանկացման գործընթաց է գնում.Արման Սահակյանը`«Կուկուռուզնիկի» մասին

Կառավարությանն առընթեր Պետգույքի կառավարման վարչության պետ Արման Սահակյանն այսօր ԱԺ-ում ներկայացրեց պետական գույքի մասնավորեցման 2006-2007 թթ ծրագրերի կատարման 2015-ի տարեկան հաշվետվությունը: Պատգամավոր Թեւան Պողոսյանը  հետաքրքրվեց «Կուկուռուզնիկի» շենքից, թե երբ են վերականգնելու քաղաքի այդ խորհրդանիշը: Արման Սահակյանն ասաց ուշագրավ մի փաստ՝ «Ինչ վերաբերում է Երիտասարդական պալատին, այստեղ ոչ մի ինֆորմացիա չեմ կարող տալ, որովհետև ինքը սնանկացման գործընթացով է գնացել, և գնորդը ոչ մի տեսակի  պարտավորություն չունի, այսինքն՝ մեր գերատեսչության միջոցով  այս գործարքը տեղի չի ունեցել»: «Սնանկացման գործընթաց է գնում, եւ գնորդը, վերջերս նորից ամբողջ գործն ուսումնասիրեցի, ոչ մի տեսակի պարտավորություն չունի: Գործարքը մեր գերատեսչության միջոցով տեղի չի ունեցել: Մենք չենք կարող դրանով զբաղվել»: Արման Սահակյանը հիշատակեց այն արատավոր պրակտիկան, որը որդեգրված է եղել. «Նախկինում այն արատավոր երեւույթը որ կար, թե ինչ գներով էին վարձակալության տալիս, կառավարման հավատարմագրման տալիս, հիմա օրենքով ամբողջը համակարգվում է: 2011-ին վարձակալությունից տարեկան հավաքագրվում էր մոտ 80 մլն դրամ, հիմա դարձել է 300 մլն դրամ՝ բարեփոխումների արդյունքում: Պետական գույքը պետք է արդյունավետ կառավարվի, ոչ թե օտարվի կամ վաճառվի »,-ասաց նա: