Իսկ այս անգամ չեն «քցվի՞»

Իշխանությունն ու ոչիշխանականներն այսօր  երկրորդ «պատմական» համաձայնությունը ստորագրեցին Ընտրական օրենսգրքի վերաբերյալ: Քաղաքական ուժերը համաձայնություն են ձեռք բերել ընտրություններից հետո ընտրողների ստորագրված ցուցակները հրապարակելու, առցանց հեռարձակման վերաբերյալ: «Այն, ինչ թվում էր անհավատալի, այն, ինչ շատ վաղուց քաղաքական ուժերը, քաղաքական հասարակությունը պահանջում էին, և թվում էր՝ այդ հարցը չի լուծվի, այժմ լուծվում է: Այսօր անհավատալին դառնում է իրական»,- ասաց ՀԱԿ խմբակցության ղեկավար Լևոն Զուրաբյանը՝ շնորհակալություն հայտնելով գործընթացի բոլոր մասնակիցներին:Լ.Զուրաբյանը գոհունակությամբ շեշտեց նաև իշխանությունների քաղաքական կամքի փաստը և վստահություն հայտնեց, որ կլինի միջազգային արձագանք: Նա նկատեց նաեւ, որ սա մաքուր և արդար ընտրությունների երաշխիք չէ, բայց դրա հիմնաքարն է. «Մեր պայքարը շարունակվում է, ոչ ոք թող մոլորության մեջ չլինի, որ պայքարն ավարտված է: Առաջ՝ դեպի մաքուր ընտրություններ»: Քաղհասարակության ներկայացուցիչները հուշագրի ստորագրմանը չմասնակցեցին: Թեեւ  ավելի վաղ հայտարարել էին, որ հավանություն են տալիս հուշագրին Հիշեցնենք, որ հունիսին էլ նույն ձեւաչափով հուշագիր ստորագրվեց, մի շարք հարցերի վերաբերյալ իշխանությունն իբր ընդառաջ գնաց, սակայն հետո իշխանությունը քցեց ոչիշխանականներին և չեղարկեց համաձայնությունը՝ անհիմն պատճառաբանություն ներկայացնելով: Նշենք, որ նոր համաձայնագրի հիմնական դրույթը ընտրություններին մասնակցած անձանց ցուցակների հրապարակումն է, այս պահանջը գրեթե 15 տարի բարձրացրել են ընդդիմադիրները, նույնքան հետեւողական էլ մերժել  իշխանությունները: Այսօր թեեւ համաձայնություն է ձեռք բերվել, բայց կասկածից վեր է, որ   ցուցակների հրապարակումը որևէ կերպ չի կասեցնելու ու չի բացառելու ընտրակեղծարարության որևէ մեխանիզմ ու չի երաշխավորելու ընտրությունների ո՛չ ազատությունը, ո՛չ արդարությունը, ո՛չ օրինականությունը: Ընտրություններն ինչպես կեղծվել են, այնպես էլ շարունակվելու են կեղծվել: Ընտրողների ցուցակների հրապարակումը ընդամենը որոշակիորեն  կանխելու է ուրիշի փոխարեն քվեարկությունը: Անշուշտ, որոակիորեն, որովհետեւ տեսականորեն հնարավոր չէ պատկերացնել, որ  ընտրողների 1,5 միլիոնանոց ցուցակները երկու օրում հնարավոր կլինի հասցնել մանրակրկիտ ստուգել, պարզել ստորագրությունները կեղծված են, թե ով, տվյալ անձը Հայաստանում է , թե ոչ,ինչպես նաեւ բողոքարկեն: Ինչպես հայտնի է ցուցակների մաքրման շուրջ համաձայնություն չի կայացվել: Եւ նույնիսկ եթե անգամ այդ համաձայնությունն էլ կայանար, վերջին ընտրությունները ցույց են տվել, որ իշխանությունները ընտրությունները կեղծելու հզոր արսենալ ունեն եւ վերջին տարիներինհիմնականում ապավինում են վարչական ռեսուրսների կրառմանը: Պարզ ասած, այս համաձայնությունն ու դրանում շարադրված մեխանիզմներն իրականում  արժեք չունեն , ըստ ամենայնի ոչ իշխանականներն իշխանության լեգիտիմացման խնդիր լուծեցին՝ 2017-ից որոշակի ակնկալիքներ ունենալով:Չնայած ոչ մի երաշխիք, որ այս անգամ էլ նրանք չեն քցվի: Անի Սահակյան