Կամ Դուք, կամ նախկին գլխավոր դատախազը ստում եք. Արամ Մանուկյանը գլխավոր դատախազի թեկնածուին

Այսօր՝ սեպտեմբերի 14-ին, ԱԺ-ում շարունակվում է ՀՀ գլխավոր դատախազի նշանակման հարցի քննարկումը: ԱԺ ՀԱԿ խմբակցության պատգամավոր Արամ Մանուկյանն այսօր իր ելույթում ասաց, որ Հայաստանի տնտեսության և սոցիալ-քաղաքական ձախողված վիճակի մեջ իր մեղքի բաժինն ունի նաև իրավական համակարգը, այդ թվում՝ Դատախազությունը: «Հայաստանը համակարգային կոռումպացված վիճակում է գտնվում: Դրա մասին վկայում են միջազգային զեկույցները, «Թրանսփարենսի Ինթերնեշնլ» հակակոռուպցիոն կենտրոնի (Transparency International Anticorruption Center) վերջին զեկույցը և չի կարող այդպես չլինել քանի որ մենք կոռումպացված առումով 127-րդ երկիրն ենք: Որքան բարձր է պաշտոնյան և բարձր է պատասխանատվությունը, այնքան նա կոռումպացված է»,-ասաց Արամ Մանուկյանը: Դիմելով Գլխավոր դատախազի թեկնածու Արթուր Դավթյանին, նա ասաց, ոչ չի պատկերացնում՝ կարողանալո՞ւ է նա այդ համակարգի դեմ դուրս գալ, թե՞ ոչ. «Երեկ բացել եմ ձեր կայքը, ու կոռուպցիայի դեմ պայքարի մասին ոչինչ չկա։ Ասեմ ավելին՝ 2016թ. զեկույցի մեջ քոփի-փեսթ են արված 2015թ. ամբողջ թվերը։ Դատախազի պաշտոնական կայքում այսպիսի փնթիությունն աններելի է։ Կարող եք բոլորդ մտնել Դատախազության կայք, նայել կոռուպցիա բաժինը»։ Արամ Մանուկյանն անդրադառնալով մի շարք գործերի, նշեց, որ նախկին դատախազը կամ ներկայիս թեկնածուն ստում են: «Մենք չենք հավատում, որ դուք կարող եք համակարգի դեմ դուրս գալ: Դուք փորձելու եք մի բան անել, բայց մենք չենք հավատում: Եվ, բնականաբար մենք չենք մասնակցելու քվերակությանը»-ասաց Արամ Մանուկյանը: