Ադրբեջանը բախվել է գլոբալ տնտեսական ճգնաժամի հետ. Շարիֆով

20:25 - 27/հունվարի/2016

Մենք արդեն բախվել ենք գլոբալ տնտեսական ճգնաժամի նոր ալիքի հետ:

Այս մասին, հայտարարել է Ադրբեջանի ֆինանսների նախարար Սամիր Շարիֆովը:

Նրա խոսքով` աշխարհում եւ համաշխարհային տնտեսության մեջ տեղի ունեցող իրադարձությունները ցույց են տալիս, որ այդ ալիքի հետեւանքները կարող են ավելի ծանր լինել, քան անցյալ տարիներին: «Ինչպես հայտնի է, 2014 թվականի վերջին նավթի համաշխարհային գները, ինչպես 2008-2009 թվականներին, դարձյալ սկսեցին նվազել, իջնելով անհավանական ցածր մակարդակի` 30 դոլարի: Դա բացասական աղդեցություն է թողնում Ադրբեջանի տնտեսության վրա, մեր արտարժույթի պահուստները նվազում են: Ցավոք, ներկայում մեր վճարային հաշվեկշիռը (արտարժույթի մուտքն ու ելքը) փոխվում է դեպի վատը: Արտարժույթի մուտքերը երկիր 4 անգամ նվազել են: Բայց ներկրման մեր պահանջարկը մնացել է նախկին մակարդակին», -ասել է նա: Սամիր Շարիֆովն ավելի վաղ հայտարարել էր, որ Ադրբեջանի 2016 թվականի հաստատված պետբյուջեն պետք է վերանայվի, որում նավթի գինը մեկ բարելի դիամց հաշվառվել է 50 դոլարի մակարդակի: Նրա խոսքով` նախարարությունը պետբյուջեի նոր նախագիծ է պատրաստում, որում նավթի գինը պետք է հաշվարկվի մեկ բարելի դիմաց 25 դոլար (virtualaz.org): Ուշագրավ է, որ Վրաստանի էկոնոմիկայի եւ կայուն զարգացման նախարար Դմջտրի Կումսիշվիլին, անդրադառնալով Ադրբեջանում ստեղծված տնտեսական ճգնաժամին, քննադատել էր Ադրբեջանի ԿԲ-ի եւ ֆիննախարարությանն այն բանում, որ վերջիններս մանաթի փոխարժեքը կայուն պահելու վրա ծախսել են 10 մլրդ դոլար: «Ադրբեջանը ծախսել է 10 մլրդ դոլար, բայց ստացել 105 տոկոս արժեզրկում», -ասել է նա: