Սրբերը չքմեղանում են
Որ ՏԻՄ ընտրությունները իշխանության աղմկահարուց ներկայացուցիչների մոտ ավելի են սրել բոլոր արատավոր հատկանիշները, որոնք եղել են նրանց կյանքի հավատարիմ ուղեկիցները, օրինակ սպառնալը, ծեծելը, ահաբեկելը եւ այլն, դրա մասին են վկայում բազում ահազանգերը, բայց որ ոմանք կփորձեին գառան դիմակ հագնել կամ հանրությանը երեւալ սրբերի դասից, պատկերացնելն անգամ անհնար էր: Օրինակ`տխրահռչակ Լիսկան՝ նույն ինքը Սյունիքի մարզպետ Սուրիկ Խաչատրյանը, ով ՏԻՄ ընտրություններին ընդառաջ ազատություն է տվել իր նազիր-վեզիրներին, որպեսզի վերահաստատի իր իշխանությունը ու ահաբեկելով մրցապայքարից հանի համայնքապետի անցակալի թեկնածունեին, չքմեղացել է, թե ինքը կապ չունի մի ծեծի հետ, որի մասին մամուլն օրերս գրեց: Հերթական ծեծկռտուքի մասնակիցը, ըստ «Ժողովուրդ» օրաթերթի, մարզպետի վարորդի տղան է՝ Դերենիկը, ով ծեծել է Գորիսի շինանյութի խանութի աշխատակցին՝ Վաչե Հարությունյանին: Աշխատակցին ծեծելու պատճառը, մարզպետի որդու՝ Տիգրան Խաչատրյանի ու այդ նշված խանութի տնօրենի միջեւ եղած վատ հարաբերություններն են: Կասկած չկա, որ այս միջադեպը կապված է ընտրությունների հետ, որովհետեւ մարզպետի ահաբեկումների եւ նախընտրական սրացումների մասին նույն լրատվամիջոցի մեկ այլ հրապարակման մեջ ավելի բացահայտ է ներկայանում իրականությունը: Ըստ այդմ Խաչատրյանն օրեր առաջ իր մոտ է հրավիրել Գորիսին միացված Վերին շեն բնակավայրից առաջադրված ավագանու թեկնածուներից չորս հոգու և պահանջել, որ նրանք ինքնաբացարկ ներկայացնեն: Թեկնածուներից մեկը եղել է ԲՀԿ-ական էրիկ Տատինցյանը, սակայն նա հրաժարվել է մարզպետի հրահանգը կատարել: Այս առնչությամբ ԲՀԿ կուսակցության տարածքային կառույցի ղեկավար Ռոբերտ Հակոբյանն արձագանքել է, որ մարտավարական տեսանկյունից չեն բացահայտում, բայց ոչ թե մեկ այլ մի քանի թեկնածու ունեն. «Երբ ինչ-որ մեկը փորձում է քիթը մտցնել, խառնվել այդ ընտանիքի գործերին, ապա նրա կողմից դա լկտիության և անաբարոյականության դրսևորում է: Եթե որևէ մեկը մեր ներկայացրած թեկնածուներից ընտրապայքարից դուրս գա, դա կլինի բացառապես մեր կուսակցության որոշմամբ», ասել է նա հաստատելով նաեւ մարզպետի միջամտությունը: Իհարկե, Սուրիկ Խաչատրյանը կարող է սրտակեղեք բառերով հերքել իր կապը բացահայտված միջադեպերին, բայց դրան կհավատան միայն իր վասալները: Ավելի զավեշտալի է Գեներալ Մանվել Գրիգորյանի որդու կեցվածքը: Էջմիածնի քաղաքապետ Կարեն Գրիգորյանի եւ բեսպրեդել հայրիկի հերոսությունների մասին լեգենդներ են պատմում: Եւ բանն այն չէ, որ քաղաքի բոլոր պետական հանգույցները գործում են նրանց ամենակարող իշխանության ներքո, ու էչ էլ այն, որ Գրիգորյանների դինաստիան սեփականաշնորհել է քաղաքի կարեւորագույն օբյեկտները, այլ խնդիրն այն է, որ Էջմիածնում շարքային քաղաքացիների կեցության պայմանները թելադրվում են այս մարդկանց կողմից, օրինակ, որտեղ կայանել ավտոմեքենան, որ անվադողերը չպատռեն, որ փողոցով կարեի է երթեւեկել, որպեսզի հանկարծ չխոչընդոտեն գեներալի դինաստիայի շարասյունը եւ տարրական այլ նորմեր, որոնց մամուլն անդրադարձել է բազմիցս: Եւ ահա, գեներելի քաղաքապետ որդին որոշել է թեւեր հագնել ու իջնել մարդամեջ, մի քանի ցիտատներ անել Սուրբ գրքից՝ հույս ունենալով, որ շաքար ասելով բերանը կքաղցրացնի.«Մարդկության մեջ հետաքրքիր բան կա: Այն է, որ միշտ փնտրում են՝ Սահմանադրություն կամ այլ կատարյալ օրենքներ, բայց երբ վերցնում ենք Սուրբ գիրքը՝ այնտեղ են բոլոր կատարյալ օրենքները: 2008 թվականին, երբ արդեն պետք է աշխատեի որպես քաղաքապետ. Պողոս առաքյալի թուղթն էր,եթե չեմ սխալվում, թե խոսքը ամրապնդվում է գործով: Ես փորձել եմ իմ բառերով այն արտահայտել, բայց իմաստը չի փոխվում»,-ասել է Կարեն Գրիգորյանը՝ վստահեցնելով, որ հենց այդ սկզբունքով էլ առաջնորդվում են: Մի կաթիլ անգամ չենք կասկածում Կարեն Գրիգորյանի խոսքերի ճշմարտացիությանը, որ իրենք <<խոսքն ամրապնդում են գործով>>, պարզապես ուզում ենք հիշեցնել իր հայրիկի թեւավոր դարձած մի քանի խոսքեր, կամ գոնե մեկը.<<Հետեւին ձեռ կտամ>>, նա այս արտահայտությունն օրումեջ անում է Ազգային ժողովում, երբ լրագրողները որեւէ հարցում նրա վստահություն իշխանության հանդեպ փորձարկում են, օրինակ, երբ դահլիճում գրանցվելուց հետո գեներալը շտապել էր դուրս գալ, իսկ լրագրողներն էլ սադրել էին, թե լքում եք խրամատը, գեներալը վստահաբար շռայլել էր.<<Լքողի հետեւին ձեռ կտամ>>: Ինչեւէ, Կարեն Գրիգորյանը որոշել է հրեշտակ ձեւանալ եւ անդրադառնալով իրեն հասցեագրված մեղադրանք-քննադատություններին ասել է.« Ով ինչ դատարանով դատի՝ այն դատարանով կդատվի: Ես իրենց կցանկանամ այնքան լավ ու բարին, որ մոռանան չար բաների մասին: Թող իրենց գործերը այնքան լավ լինեն, որ վայելքների մեջ ժամանակ չունենան մարդկանց փնովելու»: Մեղա, մեղա: Անի Սահակյան
Հետևեք մեզ Viber-ում
