Կշարունակեմ քննադատել Ռուսաստանին, եթե փորձի Ղարաբաղի անվտանգության դեմ քայլ կատարել. Ստեփան Գրիգորյան

Գլոբալիզացիայի և տարածաշրջանային հետազոտությունների կենտրոնի ղեկավար Ստեփան Գրիգորյանն այսօր հրավիրած մամուլի ասուլիսին անդրադարձավ ՌԴ-ի կողմից իր մուտքն արգելելու որոշմանը: Նա նախ ներկայացրեց իր կենսագրությունը և նշեց, որ ինքը մշտապես բաց և թափանցիկ գործունեություն է ծավալել: Քաղաքագետը հիշեցրեց, որ օգոստոսի 30-ին իրեն թույլ չեն տվել մուտք գործել Ռուսաստան և ըստ տրված տեղեկագրի՝ այդ արգելքը հիմնավորվել է դեպի ՌԴ ելքն ու մուտքը կարգավորող օրենքով։ Նրա խոսքով՝ այդ օրենքը հիմնականում վերաբերում է խախտումներ կատարելուն և միայն մեկ կետ կա, որը, ըստ քաղաքագետի, հնարավոր է, որ վերաբերի իրեն։ Ստեփան Գրիգորյանը նաև նշեց, որ այդ օրենքով սահմանափակվում է այն գործիչների մուտքը ՌԴ, որոնք համագործակցում են այնպիսիի կազմակերպությունների հետ, որոնք Ռուսաստանի համար անցանկալի են: Քաղաքագետը նշեց, որ ինչ-որ տեղ կհասկանար, եթե իր մուտքը երեք կամ հինգ տարով արգելվեր, սակայն մինչև 2030 թվականն արգելելը ակնհայտ ճնշում է ՀԿ-ի վրա և նշանակում է, որ դա քաղաքական նպատակ է հետապնդում։ «ՀՀ ԱԳՆ-ն նույն օրը շատ արագ արձագանքեց, Ռուսաստանի կողմից արձագանք դեռ չեմ լսել»,-ասաց նա և նշեց, որ խորհրդակցել է Հայաստանում իրավաբանների հետ և իր իրավունքները կպաշտպանի միջազգային կառույցներում: «Ես հավաստիացնում եմ, որ կշարունակեմ իմ աշխատանքը ու կշարունակեմ քննադատել Ռուսաստանի քաղաքականությունը, եթե փորձ արվի Լեռնայի Ղարաբաղի անվտանգության  դեմ քայլ կատարել, ոչ մեկ ինձ այդ դեպքում չի կարող կանգնեցնել»- ասաց նա: