Ի՞նչ է մեզ սպասվում աշնանը

«Առավոտ» թերթն իր խմբագրականում գրում է. «Որեւէ լուրջ իրավական եւ քաղաքական գնահատական չի տրվել հուլիսյան իրադարձությունների ընթացքում ոստիկանության բազմաթիվ ապօրինություններին։ Մասնավորապես, ինձ թվում է, որ Հայաստանում շատ բան կփոխվի, եթե գոնե ՄԵԿ ոստիկան ազատազրկվի՝ նման իրադարձությունների ժամանակ լրագրողների աշխատանքը խոչընդոտելու համար։ Ի՛նչ է մեզ սպասվում աշնանը։ Մի քանի օրի՛ց վերսկսվելու են Ազգային ժողովի լիագումար նիստերը։ Զարուհի Փոստանջյանն առաջին քառօրյայի ընթացքում կփորձի խոսել հուլիսյան իրադարձությունների մասին (բնականաբար, իր հեղափոխականի տեսանկյունից), էդուարդ Շարմազանովը մի քանի անգամ անջատելու է Զարուհու խոսափողը։ Ընդհանրապես սպասվում են բազմաթիվ բոցաշունչ ու չափազանց գեղարվեստական ելույթներ։ Կայքերի մեծ մասը եւ Ֆեյսբուքը, ինչպես ասում են, «ղժժալու» են դրանց վրա։ Այդ տեղեկատվական աղմուկի ներքո կտապալվեն Ընտրական օրենսգիրքը բարելավելու բոլոր փորձերը, եւ երրորդ ընթերցմամբ կընդունվի հարկային օրենսգիրքը, որի նպատակն է հավելյալ գումարներ հավաքել «սպիտակ» եկամուտներ ստացող քաղաքացիներից ստվերում թողնելով «սեւերին»)։ Էլ չասեմ, որ տեղական ինքնակառավարման ընտրություններում հաղթելու են հիմնականում իշխանության թեկնածուներն ու կուսակցությունները։ Մի  խոսքով՝  սպասվում է «հետաքրքիր»  աշուն»: Առավել մանրամասն՝ թերթի այսօրվա համարում