Խանումյանի գործը փակեցին, իսկ պատգամավորին ծեծողներն ազատ արձակվեցին

ԼՂՀ ԱԺ պատգամավոր Հայկ Խանումյանին ծեծի ենթարկելու վերաբերյալ քրեական գործը կարճվել է: Այդ գործով մեղադրյալ համարվող անձինք ազատ են արձակվել: Այս մասին փոխանցում է ԼՂՀ գլխավոր դատախազության պաշտոնական կայքէջը: Հայտարարությունում ասվում է. «Քրեական գործն ըստ մեղադրանքի Էրիկ Պողոսյանի, Սերգեյ Ավանեսյանի, Միքայել Սահակյանի՝ նախատեսված ԼՂՀ ՔՕ 269-րդ հոդվածի 3-րդ մասի 1-ին և 3-րդ կետերով, Նիկոլայ Գաբրիելյանի՝  նախատեսված ԼՂՀ ՔՕ 37-րդ հոդվածի 5-րդ մասով, 112-րդ հոդվածի 2-րդ մասի 3-րդ և 6-րդ կետերով, կարճվել է, և նրանց նկատմամբ քրեական հետապնդումը դադարեցվել է ԼՂՀ ՔԴՕ 35-րդ հոդվածի 1-ին մասի 13-րդ կետի հիմքով (ընդունվել է համաներման ակտ): Միաժամանակ վերացվել է նրանց նկատմամբ կիրառված խափանման միջոցը` կալանավորումը»: Հիշեցնենք, որ ավելի վաղ այդ անձանց վերաբերյալ քրեական գործը վերաորակվել էր, մեղադրանքն ավելի մեղմացվել էր: Այսօր ԳԱԼԱ-ի հետ զրույցում պատգամավոր Հայկ Խանումյանը հայտարարեց, որ իր համար անակնկալ չէր նման ելքը: Նման զարգացում, ըստ Խանումյանի, ինքը կանխատեսել էր դեռ հունիս ամսին: Խանումյանն ասաց, որ փաստաբանի՝ Հայկ Ալումյանի հետ քննարկելու է իրավական հարթությունում խնդիրը լուծելու տարբերակներ: Ի վերջո նպատակն այն է, որ դիմելու են Եվրոպական դատարան: Հիշեցնենք, երկու օր առաջ ԼՂՀ ԱԺ պատգամավոր Հայկ Խանումյանը ֆեյսբուքյան հայտարարություն էր տարածել, որում մասնավորապես ասում էր, որ իր գործով որոշումները կատարվում են Բակո Սահակյանի կաբինետում, և որ նախաքննական մարմինն ու դատախազությունն իրենց որոշումներում ենթարկվել են նախագահականի ճնշմանը: «Այս ամենը գալիս է հաստատելու այն վարկածը, որ ինձ առևանգելու և ծեծելու ամբողջ գործողությունը մշակվել է Բակո Սահակյանի համաձայնությամբ: Այն, որ Արցախում գործերի քննությունը հաճախ է ենթարկվում տարատեսակ միջամտությունների, նորություն չէ, բայց առաջներում գոնե փորձում էին գրագետ իրավական ձևակերպումներ գտնել: Գործի հետ այս կարգի կացինավարի վարվելը նոր միտում է արցախյան արդարադատության ոլորտում»: