Ճնշումներ են գործադրում Հովհաննես Հարությունյանի փաստաբանի վրա

«Սասնա ծռեր» խմբի անդամ Հովհաննես Հարությունյանն այս պահին ծանր վիճակում է գտնվում, նրան շտապ բուժօգնություն է հարկավոր: Այս մասին այսօր` օգոստոսի 30-ին, լրագրողների հետ հանդիպմանն ասաց նրա պաշտպան Հայարփի Սարգսյանը:«Նրան շտապ բուժօգնություն է հարկավոր: Այս պահին որոշակի անորոշություն կա, տարբեր բժիշկներ են նայել, բոլորը պատճառաբանում են, որ նա դեռևս չի կարող վիրահատվել, քանի դեռ նրա վերքերը չեն լավացել, իսկ հուլիսի 26-ին, երբ Հովհաննես Հարությունյանը հրազենային վիրավորում էր ստացել, նրան բուժօգնություն է ցուցաբերվել շուրջ երկու ժամ հետո և մինչ օրս վիրահատության չի ենթարկվել»,-ասաց փաստաբանը: Փաստաբանը նշեց, որ այն անտարբերությունը, որը կա Հովհաննես Հարությունյանի նկատմամբ, չկա «Սասնա ծռերի» մյուս անդամների նկատմամբ: Հովհաննսես Հարությունյանը խնամքի կարիք ունի, իսկ բուժօգնությունը նորմալ չի ցուցաբերվում. «Երբ իմ ներկայությամբ բժիշկը Հովհաննեսին «սիստեմա» էր միացնում, ինչը նրա մոտ չէր ստացվում, անկեղծացավ` ասելով, թե կյանքում առաջին անգամ է նման բան անում»: Այնուհետև տեղեկացրեց նաև, որ քանի որ ինքը բարձրաձայնում է. «Դատապարտյալների հիվանդանոցի» սենյակի պայմանների մասին, իր վրա ճնշում են գործադրում: «Վերջերս քրեակատարողական վարչությունը չափերն անցել է, իմ մասին հայտարարություններ անելով: Քրեակատարողական հիմնարկն ինձ հետ կապված վարկաբեկող հայտարարություններ է անում»: