Ստամբուլի Աթաթուրքի անվան օդանավակայանում ահաբեկիչների դեմ կպայքարեն «թակարդ»-ով

Թուրքիայում վերջին շրջանում մեծ թափ առած ահաբեկչական գործողությունների հետևանքով սկսել են կարևոր փոփոխություններ իրականացնել նաև օդանավակայանների անվտանգության համակարգում: Այս մասին հաղորդում է «Սաբահ» թերթը: Ստամբուլի ամենամեծ՝ Աթաթուրքի անվան օդանավակայանում այսուհետ կկիրառվի «թակարդ» կոչվող անվտանգության համակարգը, որն ուղղված է լինելու զինված ահաբեկիչներին բացահայտելուն և տեղում վնասազերծելուն: «Թակարդն» իրենից ներկայացնելու է խցիկ, որն ունենալու է փոքրիկ վերելակի տեսք և թույլ է տալու նույն վայրկյանին վնասազերծել վտանգավոր անձին: Նշվում է, որ եթե անգամ մահապարտ ահաբեկիչը հասցնի իրեն պայթեցնել, այս սարքը թույլ չի տալու, որպեսզի պայթյունը վնաս հասցնի շրջապատի մարդկանց: