Սիրիական ավիացիան սկսել է ռմբակոծել քրդերին. Gazeta.ru

Gazeta.ru-ում հրապարակվել է վերլուծական հոդված, որում խոսվում է Սիրիայի, Թուրքիայի, Ռուսաստանի և ԱՄՆ-ի կողմից սիրիաբնակ քրդերի հանդեպ տարվող քաղաքականության մասին: Կայքը գրում է, որ Ռուսաստանի նախագահ Վլադիմիր Պուտինի և Թուրքիայի նախագահ Ռեջեփ Թայիփ Էրդողանի հանդիպումից հետո սիրիաբնակ քրդերի հանդեպ վերաբերմունքի կտրուկ փոփոխություն է նկատվել: Նշվում է, որ սիրիական ավիացիան հարձակումներ է իրականացնում երկրի հյուսիս-արևելքում բնակվող քրդերի դիրքերի վրա, որոնք մինչև վերջին ժամանակները Սիրիայի նախագահ Բաշար Ասադի դաշնակիցներ են համարվել: Հասեկե քաղաքի տարածքում ԱՄՆ գրոհայիններն արդեն պաշտպան են կանգնել քրդական աշխարհազորին: Հոդվածագրի կարծիքով` Ասադի հենանիշների անսպասելի փոփոխությունը կարող է արտացոլել Ռուսաստանի և Թուրքիայի դիրքորոշումների մոտեցումը: Հոդվածում ասվում է, որ Թուրքիայի կողմից ակտիվ աջակցության բացակայության դեպքում ռուս-իրանա-սիրիական կոալիցիան չի կարող ջախջախել Հալեպում և հարակից տարածքներում գործող ծայրահեղական խմբավորումները: Թուրքական կողմի գործողությունների վերաբերյալ հոդվածագիրը կարծիք է հայտնել, որ Թուրքիան իրավունք ունի զիջումներ սպասել Ռուսաստանից, և Անկարան բազմիցս հայտնել է, որ իր բոլոր արտասահմանյան գործընկերները պետք է հրաժարվեն քրդերի ցուցաբերած աջակցությունից: