Խմբավորումներ էին գործում ոստիկանների հետևում. Արմեն Մարտիրոսյան
Ժառանգություն» կուսակցության փոխնախագահ Արմեն Մարտիրոսյանը, ով օր առաջ է ազատ արձակվել կալանավայրից, այսօր լրագրողների հետ հանդիպման ժամանակ նշեց, որ իր նկատմամբ տեղի ունեցածը քաղաքական հետապնդում էր: Հարցին, թե հիմքեր կայի՞ն իրեն ազատությունից զրկելու, Արմեն Մարտիրոսյանը բացասական պատասխան տվեց. «Ոչ մի հիմք չկար, ամբողջովին ապօրինի էր, քաղաքական հետապնդում էր: Տեսել եք՝ քարը ձեռքին ոստիկանությունից ինչ էին իրականացնում, ինչ խմբավորումներ էին գործում ոստիկանների հետևում, քաղաքացիական անձինք՝ ձեռքներին տարբեր տեսակի ձողեր: Այս ամենը դուք արձանագրել եք, ինչի համար շնորհակալ եմ, հենց դրա շնորհիվ ապացուցվել է իմ ու մնացած քաղբանտարկյալների անմեղությունը: Քրեական գործ հարուցելը ապօրինի, շինծու, քաղաքական հաշվեհարդար տեսնող քայլ էր, ոչ ավելին»,- նշեց Արմեն Մարտիրոսյանը: «Ժառանգություն» կուսակցության փոխնախագահն ասաց, որ իրեն ձերբակալելուց հետո իր համար անթույլատրելի էր պատգամավոր Նիկոլ Փաշինյանի գնահատականը: Անդրադառնալով Նիկոլ Փաշինյանի հարցադրումներին՝ Արմեն Մարտիրոսյանն ասաց. «Ես երբեք ինձ թույլ չեմ տվել որևէ կալանավորվածի հետ կապված հարցադրումներ հնչեցնել, որքան էլ հիմնավոր լինեն, բայց այս պարագայում ինքը, ցավոք, իմ մասին խոսքեր ասաց, որոնք ոստիկանության ներկայացուցիչներ էին ցուցմունքներում գրել»:
Հետևեք մեզ Viber-ում
