Ինչու է ՀՀԿ-ն խտրականություն դնում յուրայինների մեջ
ՀՀ գրեթե բոլոր համայնքներում կայանալու են քաղաքապետի եւ ավագանու ընտրություններ, սակայն այս ընտրությունները ոչ բոլոր ՀՀԿ-ականների համար է բարեհաջող սկսվել։ Մեկնարկը նոր է տրվել, բայց մի շարք համայնքներում, նույնիսկ քաղաքներում ՀՀԿ-ն չի առաջադրում գործող քաղաքապետերին։ Սա այն պարագայում, երբ ՀՀԿ-ին մշտապես քննադատել են փոփոխությունների չգնալու եւ հազար տարվա համայնքի ղեկավարներին վերաառաջադրելու համար։ Տվյալ քաղաքապետերը տարիներով անձնվիրաբար ծառայում են իրենց սատարած իշխանություններին։ Վանաձոր, Արթիկ եւ Մասիս քաղաքներում իշխող կուսակցությունը որոշել է խախտել ավանդույթն ու այլ անձանց առաջադրել։ 1999 թվականից մինչ օրս Վանաձորի քաղաքապետի աթոռին բազմած Սամվել Դարբինյանը, որը ՀՀԿ-ի հովանավորչությունը վայելելով չորս անգամ քաղաքապետ է վերընտրվել, այլեւս չի առաջադրվի։ Նրա փոխարեն այժմ ՀՀԿ-ն կսատարի Վանաձորի նոտար Մամիկոն Ասլանյանին։ Արթիկում էլ Արսեն Աբրահամյանի փոխարեն առաջադրվելու է ԲՀԿ-ից հեռացած պատգամավոր Մուշեղ Պետոյանը։ Մասիսում երկարամյա քաղաքապետական փորձ ունեցող Սաշա Հակոբյանն է դուրս մնացել խաղից, ու առաջադրել են մեկ ուրիշին՝ Դավիթ Համբարձումյանին, որը «Թույների Մհեր» անունով հայտնի Մհեր Համբարձումյանի որդին է, ըստ մամուլի հրապարակումների, մասնակցել է Սարի թաղի հայտնի դեպքերին՝ ցուցարարների հանդեպ բռնություն կիրառած քաղաքացիական հագուստով անձանց է առաջնորդել։ Նա նաեւ ոստիկանապետի թիկնազորի պետ Արշակ Հակոբյանի փեսան է եւ Մասիսում վեց ամիս առաջ է ընդամենը գրանցվել, հիմա էլ ապրում է Երեւանում։ Մինչդեռ Էջմիածնում արդեն երրորդ անգամ առաջադրվել է գեներալ Մանվել Գրիգորյանի որդին՝ գործող քաղաքապետ Կարեն Գրիգորյանը: Այսինքն, նշանակում է, որ ՀՀԿ-ն չի որդեգրել սահուն սերընդափոխության եւ առհասարակ փոփոխության սկզբունքը, այլ առաջնորդվում է սեփական շահերով, ում դիրքերն ուժեղ է, նա շարունակում է մնալ։ ՀՀԿ-ական պատգամավոր Լեռնիկ Ալեքսանյանը վստահեցնում է, որ ՀՀԿ-ն խտրականություն չի դնում յուրայինների մեջ.«Ես ինչքան տեղյակ եմ թեկնածուների ընտրությունը թողնված է տվյալ տարածքի կուսակցական կառույցի, խորհրդի վրա» -ասաց ՀՀԿ-ական պատգամավորը։ Ալեքսանյանը չհամաձայնեց, թե մեկ ուրիշ օրինաչափության համաձայն է կարգավորվում հարցը. «Ես գոնե այդ մասին չգիտեմ, ես կարող եմ Արարատի մարզի վերաբերյալ պնդել, որ որեւէ խտրականություն չի դրվում։ Ընդհանուր սկզբունքն այն է, որ վերաառաջադրվում են այն մարդիկ, որոնց համայնքն ընդունում է, որոնց աշխատանքն ակնհայտ է»։ ՀՀԿ-ական պատգամավորին տեղեկացրեցինք, որ գործող քաղաքապետերից ոմանց թույլ չեն տալիս առաջադրվել, ինչպես պիտի համայնքը տա իր գնահատականը.«Գիտեք, եթե մարդը նորմալ աշխատել է ու համայնքն էլ ընդունում է, ես չեմ տեսել վերջին 15 տարում մի դեպք, որ համայնքը մեկին միանշանակ ընդունի եւ նրան թույլ չտան, եթե, իհարկե, լուրջ խնդիրներ չկան»։ Ալեքսանյանը պնդեց, որ համայնքներում «չթույլատրելու» խնդիր չկա: «Գյուղում, օրինակ ինչքան էլ չուզենք, որ ինչ որ թեկնածու առաջադրվի, բայց նա կառաջադրվի ու եթե կընտրեն, կհաղթի»,- ասաց Ալեքսանյանն անդրադառնալով նաեւ Մասիսին.«Մասիսի քաղաքապետը ՀՀԿ-ական է, միշտ էլ ՀՀԿ-ի շահերն է պաշտպանել ու հնարավոր չէ, որ նրան կանչեին ասեին, թե դու մի առաջադրվի, մեկ ուրիշն է առաջադրվում»։ ՀՀԿ-ական պատգամավորը վստահեցրեց, որ իշխող կուսակցությունը ինչպես միշտ, այս անգամ էլ հետամուտ է լինելու ազատ, արդար ընտրություններ անցկացնելու հարցում։ Նշենք, որ ՀՀԿ-ն աննախադեպ ակտիվություն է դրսեւորում ի տարբերություն ընդդիմադիր ուժերի։ ՀԱԿ-ը, «Օրինաց երկիրը», ԲՀԿ-ն եւ այլ ոչ իշխանականներ դեռ չեն շտապում թեկնածուներ առաջադրել։ Անի Սահակյան
Հետևեք մեզ Viber-ում
