ԻՊ-ը կոչ է արել ձախողել «Միսս աշխարհ» միջոցառումը
«Իսլամական պետություն» ահաբեկչական խմբավորումը դիմել է իր գաղափարակիցներին` կոչ անելով ջիհադ իրականացնել 2017թ. հունվարին Ֆիլիպիններում կայանալիք «Միսս աշխարհ» գեղեցկության մրցույթի ժամանակ ու ձախողել միջոցառումը: Ինչպես նշում է The Telegraph-ը, ահաբեկչական կոչերը հնչել են վիրտուալ տիրույթում: Դրանց կից հրապարակվել են նաև ուսուցողական տեսանյութեր, որտեղ ներկայացվել են ինքնաշեն պայթուցիկներ պատրաստելու մեթոդները: Աղբյուրը մանրամասնում է, որ իսլամիստների հղած կոչերից մեկում նշվել է, որ «բոլոր նրանք, ովքեր հնարավորություն ունեն, պետք է հարձակումներ գործեն գեղեցկության մրցույթի անցկացման ժամանակ»: Հայտնի է, որ վերջին շրջանում Ֆիլիպիններում ահագնանում է ԻՊ-ից եկող վտանգը: Ֆիլիպինների հարավային հատվածում հաստատված ու երկրի իսլամականացման համար պայքարող «Աբու Սայյաֆ» զինյալների խումբն իր հավատարմությունն է հայտնել ԻՊ-ին:
Հետևեք մեզ Viber-ում
