ՕՊԵԿ-ի երկրները Ալժիրում ոչ պաշտոնական հանդիպում կանցկացնեն

  ՕՊԵԿ-ի անդամ երկրները սեպտեմբերին Ալժիրում ոչ պաշտոնական հանդիպում կանցկացնեն Միջազգային էներգետիկ համաժողովի շրջանակում: Ըստ The Wall Street Journal-ի՝ այս մասին հայտարարել է ՕՊԵԿ-ի նախագահ, Քաթարի էներգետիկայի նախարար Մոհամմեդ ալ-Սադան: Gazeta-ի փոխանցմամբ՝ ՕՊԵԿ-ի երկրներն անհանգստացած են նավթի շուկայում գների անկմամբ եւ մշտապես բանակցում են՝ իրադրությունը կայունացնելու համար: Միաժամանակ, Ալ-Սադան դրական է գնահատում տարվա երկրորդ կեսին ոլորտում տիրող իրավիճակը, քանի որ հումքի ավելի մեծ պահանջարկ է ակնկալվում: «2016 թվականի երրորդ եւ չորրորդ եռամսյակներում նավթի հումքի ավելի բարձր պահանջարկի ակնկալիքները՝ պաշարների նվազման հետ մեկտեղ, փորձագետներին բերում են եզրահանգման, որ շուկայում տիրող այժմյան իրադրությունը ժամանակավոր բնույթ է կրում, իսկ նավթի գինը տարվա վերջին ամիսներին կաճի»,- հայտարարել է ՕՊԵԿ-ի ղեկավարը: Հիշեցնենք, որ Վիեննայում կայացած վերջին պաշտոնական հանդիպման ժամանակ ՕՊԵԿ-ի անդամները կրկին չկարողացան համաձայնության հասնել նավթի արդյունահանման ծավալների սառեցման շուրջ, սակայն կազմակերպության նոր գլխավոր քարտուղար ընտրեցին: