Ասել են՝ զանգի եղբորդ ասա, որ զենքը վայր դնի. Shabat.am

«Սասնա Ծռեր» խմբի անդամ Աշոտ Պետրոսյանի եղբորը՝ Լիպարիտ Պետրոսյանին, ով դատապարտված է «Շանթ Հարությունյանի և ընկերներ» գործով ու գտնվում է Կոշ ՔԿՀ-ում, հուլիսի 17-ից տեղափոխել են մեկուսարան ու հոգեբանական ճնշումներ գործադրել նրա նկատմամբ: Այս մասին Shabat.am-ին փոխանցեց Աշոտ Պետրոսյանի դուստրը՝ Տաթևիկ Պետրոսյանը: «Առաջին օրերին՝ ամսի 17-ից, երբ սկսվեցին այդ գործողությունները, սկսել են նրա վրա հոգեբանական ճնշում գործադրել ու տարել մեկուսարան, անընդհատ հոգեբանական ճնշում են գործադրել, ասել են՝ զանգի եղբորդ ասա, որ զենքը վայր դնի: Ոչ միայն եղբոր համար են ճնշում գործադրել, ասել են՝ երեխաներ ունեք դուք, վտանգավոր է այս ամեն ինչը ձեր ընտանիքի անդամների համար»,-մանրամասնեց Տաթևիկ Պետրոսյանը, հավելելով, որ հորեղբայրն այդ ընթացքում չի զանգել իր հորը: Նրա խոսքով, Լիպարիտ Պետրոսյանը երկու օր առաջ է դուրս եկել մեկուսարանից. «Տեսակցել եմ, առողջական խնդիրրներ չունի, փառք Աստծո, բայց ինքը շատ նեղված էր այս ամեն ինչից, նամանավանդ, որ եղբայրը վիրավոր է: Չնայած հույսը չի կորցնում, մեզ անընդհատ ասում է, որպեսզի մենք պայքարենք ընտանիքի անդամներով»: Նշենք, որ «Սասնա Ծռեր» Աշոտ Պետրոսյանը կալանավորված է, գտնվում է «Դապարտյալների հիվանդանոց»-ում: