Թուրքիայի ՊՆ-ն բանակին կզրկի հեղաշրջումներ իրականացնելու հնարավորությունից

Թուրքիայի իշխանությունները նախատեսում են վերակազմավորել Զինված ուժերը՝ երկրում եւս մեկ հեղաշրջման փորձ թույլ չտալու նպատակով: Վերակազմավորումը կիրականացվի ՆԱՏՕ-ի չափանիշներին եւ ոգուն համապատասխան: Այս մասին Reuters գործակալության հետ զրույցում ասել է Թուրքիայի ազգային պաշտպանության նախարար Ֆիքրի Ըշըքը: «Վերակազմավորումն ուղղված է այն մեխանիզմի վերացմանը, որը վերջին 60 տարվա ընթացքում վեց մանր եւ խոշոր հեղաշրջումների պատճառ է դարձել: Քայլեր են ձեռնարկվում... ՆԱՏՕ-ի կառուցվածքին եւ ոգուն համապատասխան»,- ասել է նախարարը: Գործակալության տեղեկություններով՝ Ըշըքը նաեւ նշել է, որ 288 զինվորականներ, այդ թվում՝ 9 գեներալներ, որոնք, հավանաբար, մասնակցել են հուլիսի 15-16-ի պետական հեղաշրջման փորձին, դեռեւս փախուստի մեջ են: Պաշտպանության նախարարը նաեւ հայտնել է, որ ԱՄՆ գլխավորած կոալիցիան Ինջիրլիք ավիաբազայից շարունակում է հարվածներ հասցնել «Իսլամական պետություն» ահաբեկչական խմբավորմանը, որի աշխատանքը ժամանակավորապես դադարեցվել էր հեղաշրջման փորձի հետ կապված: Թուրքիայում հուլիսի 16-ի գիշերը խռովարարների խմբի կողմից տեղի է ունեցել ռազմական հեղաշրջման փորձ: Զոհվել է 246 մարդ՝ չհաշված խռովարարներին, ավելի քան 2 հազար մարդ վնասվածքներ է ստացել: Ձերբակալվել է 13 հազար մարդ, այդ թվում՝ զինվորականներ, ոստիկաններ, դատավորներ եւ դատախազներ: