ԱՄՆ -ում ձնաբքի զոհերի թիվը հասել է 18-ի

ԱՄՆ արևելյան ափին եղանակային պայմանների կտրուկ վատթարացման պատճառով մահացել է առնվազն 18 մարդ: Նրանց մեծ մասը դարձել է ճանապարհատրանսպորտային պատահարների զոհ՝ տեղեկացնում է Associated Press-ը: Հունվարի 23-ին երկրի արևելյան շրջաններում սկսվել է ձնամրրիկ: Տեղացել է միանգամից 90 սմ ձյուն, տասնյակ հազարավոր մարդիկ մնացել են ճանապարհներին: Ընդհատվել է Վաշինգտոնի և Նյու Յորքի միջև տրանսպորտային կապը: Այդ քաղաքներում չի աշխատում հասարակական տրանսպորտը՝ բացի Նյու Յորքի մետրոպոլիտենից: Շաբաթ օրը տարածաշրջանում չեղարկվել է 4400 չվերթ, հանգստյան օրերին չեղարկված չվերթների թիվը ընդհանուր առմամբ հասնում է 6300-ի: Փոթորիկը խափանել է նաև էլեկտրամատակարարումը: Նյու Ջերսի նահանգում մոտ 50 հազար սպառող մնացել է առանց հոսանքի: Սպասվում է, որ արտակարգ եղանակային պայմանները կպահպանվեն մինչև կիրակի օրվա կեսը: