Որևէ ահաբեկչություն չկա, գործողությունը բացառապես քաղաքական է. «Առաքելություն»
Գրեթե 10 օր է, ինչ հանրապետությունում տիրում է քաղաքական աննախադեպ իրավիճակ: Ապստամբների կողմից ՊՊԾ գնդի գրավումն ինչպես իշխանության, այնպես էլ մի շարք քաղաքական ուժերի կողմից առաջին պահին որակվեց որպես ահաբեկչություն: Ապստամբների կողմից հետագա գործողությունները սակայն, ապացուցեցին, որ որևէ ահաբեկչություն չկա, գործողությունը բացառապես քաղաքական է: Ի դեպ, տեղի ունեցածը նաև Քրեական օրենսգրքով չի համարվում ահաբեկչություն: Խմբի կողմից ոստիկանների ազատ արձակումը մեկ անգամ ևս փաստում է իրավիճակի խաղաղ լուծման պատրաստակամությունը, ներկայումս խմբի զինված լինելը չի վտանգում մարդկանց կյանքն և առողջությունը: Ընդ որում, արդեն մի քանի օր է հանրահավաքները կրում են բացառապես խաղաղ բնույթ, զերծ են որևէ միջադեպերից: «Առաքելություն» կուսակցությունն աջակցություն է հայտնում Խորենացի փողոցի խաղաղ հավաքներին՝ նպաստելու համար իրավիճակի խաղաղ հանգուցալուծմանն ու քաղաքական հասունացած փոփոխություններին: Իրավիճակի խաղաղ հանգուցալուծման որոշումը, կարծում ենք, իշխանությունների կողմից չի վերանայվի, կարվի առավելագույնն՝ առանց բախումների արդյունքի հասնելու համար։ Միևնույն ժամանակ, որպես պահանջների քննարկում, առաջարկում ենք հրավիրել ԱԺ արտահերթ նիստ` հետևյալ օրակարգով` • ՀՀ և ԼՂՀ միջև ռազմական համագործակցության պայմանագրի կնքում՝ համաձայն որի, ԼՂՀ Սահմանադրությամբ ամրագրված տարածքի անվտանգությունը ապահովվում է ՀՀ ԶՈՒ կողմից: ՀՀ ԶՈՒ ենթակայության տակ գտնվող ՀՀ և ԼՂՀ տարածքներից ԶՈՒ ամբողջական/ մասնակի դուրս բերման մասին որոշումը կայացնում է գերագույն գլխավոր հրամանատարը` որոշումը հանրաքվեով հաստատվելու դեպքում: Պայմանագիրը ներկայացվում է հանրաքվեի, փոփոխությունները կատարվում են բացառապես հանրաքվեով, ուժի մեջ է անժամկետ: • ԱԺ պատգամավորների կողմից դիմում դատարանին առնվազն մեկ տարի ժամկետով քաղաքական բանտարկյալների խափանման միջոցի փոփոխման միջնորդությամբ՝ հանրապետությունից չբացակայելու պայմանով, այդ ընթացքում գործերի վերանայում և արդարացում: • ԱԺ պատգամավորների կողմից դիմում դատարանին՝ապստամբների նկատմամբ հարուցված քրեական գործի շրջանակներում առնվազն մեկ տարի ժամկետով հանրապետությունից չբացակսյելու խափանման միջոց կիրառելու միջնորդությամբ՝այդ ընթացքում գործի քննում: • Կառավարության կառուցվածքի մասին օրենքում փոփոխության կատարում՝ ուժային կառույցներն ընդգրկելով Կառավարության կազմում։ • Եթե Սերժ Սարգսյանի հրաժարականի պահանջի հարց իշխանությունները դեռևս չեն ուզում քննարկել՝ Կառավարության հրաժարականի քննարկում՝ ձևավորելու համար նոր, տարբեր ուժերի կողմից բաղկացած Ազգային համաձայնության Կառավարության, որը հրատապ լուծում կտա սոցիալ-տնտեսական խնդիրներին, ինչպես նաև կկազմակերպի խորհրդարանական ընտրություններ։ Համոզված ենք, նշվածը զերծ կպահի հետագա բախումներից, կնպաստի Արցախյան հիմնահարցում Հայաստանի դիրքերի ուժեղացմանը: «Առաքելություն» կուսակցության քաղաքական խորհուրդ
Հետևեք մեզ Viber-ում
