Ինչի են պատրաստ Խորենացի փողոցի «մոդերատորները»

Վերջին երկու օրերին Խորենացի փողոցում տեղի ունեցող իրադարձությունները արդեն պարզ ցույց են տալիս, որ ՊՊԾ գունդը գրավածների նպատակը միայն ժողովրդական լայն զանգվածների աջակցությունը չէ փողոցում: Նախ, բավական ցայտուն Նիկոլ Փաշինյանին այնտեղից «լիկվիդացնելու» կոնկրետ օպերացիա իրականացվեց, հաջորդը «զոհը» թերեւս Դավիթ Սանասարյանն է: Նիկոլն օրինակ հայտարարում էր, որ թույլ չի տա արյունահեղություն ու ամեն ինչ կանի, որ Պավլիկ Մանուկյանի ու Վալերի Օսիպյանի գլխից մի մազ պակասի:Նիկոլ Փաշինյանն ակնհայտորեն այնտեղ հանդարտություն սահմանելու կանոններով էր հանդես գալիս, կոնկրետ քայլեր էր անում այդ ճանապարհին եւ որոշակի հաջողության էր հասել: Բայց ինչպես երևում է ՊՊԾ գունդը գրավածներին «խաղաղ ընթացք» հարկավոր չէ նաև փողոցում: Այդ իսկ պատճառով երկու օր է այնտեղ ժողովրդին ուղղորդելու գործառույթ է իրականացնում Սեֆիլյանի կողմնակիցներից` Անի Նավասարդյանը, որը ժամանակ առ ժամանակ հանդես է գալիս «պահանջ-առաջարկներով», ոստիկանության ուղղում է պահանջներ, ժամանակ է սահմանում, մեկ 30-40 րոպե, ապա 10 րոպե, ապա հայտարարում է, որ ժամանակը սպառվեց, ու սպասում է, թե երբ շարքերում ոչ սթափ վիճակում գտնվող հայհոյող, «գողական» ինչ-որ կերպարներն ու ոչ ադեկվատներն ինչպես կարձագանքեն իր պահանջներին: Ու շարքերից սկսվում է. «Հելնենք Սարի թաղ», Անին` ուղերձը փոխանցում է խոսափողով ու այսպես շարունակ: Կարճ ժամանակ անց, երբ պարզվում է, որ արձագանք չստացավ այդ առաջարկը, Անին անմիջապես ունի մեկ այլ առաջարկ` «ժողովուրդ, չգնա՞նք Շենգավիթի ոստիկանություն, այնտեղ առավոտվանից մայրեր են կանգնած...»: Ապա` հայտարարում է. «Տեղեկություն ստացանք, որ 20 հոգի բերման են ենթարկել Սարի թաղից», սակայն րոպեներ անց պաշտոնապես հերքվում է, որ այդ տեղեկությունը իրականությանը չի համապատասխանում: Նախօրեին երեկոյան բախման ականատեսները պատմում են, որ նույն Անի Նավասարդյանն է հերթական անգամ ժամանակ տվել ոստիկաններին` սննդի մատակարարման հարցով, ժամանակը սպառվելուց հետո էլ տեղի ունեցան բախումները, շարքերից քարերեր են նետել ոստիկանության ուղղությամբ, հետո սկսվեցին բախումները, տասնյակ վիրավորներ տեղափոխվեցին հիվանդանոց: «Սասնա Ծռերի» «մոդերատորների» ուղերձներից կարելի է եզրակացնել, որ ՊՊԾ-ն գրավածները հասարակական աջակցությունը տեսնում են` հասարակությանը ոստիկանության հետ բախումների միջոցով, այսինքն` փողոցում արյունահեղության: Սա կարևոր բացահայտում էր հատկապես նրանց համար, ովքեր միամտորեն կարծում են, թե գնում են Խորենացի փողոց` արյունահեղությունը ՊՊԾ-ում կանխելու համար: Մետաքսյա Շալունց