ԱԱԾ-ն պետք է զբաղվի Նարեկ Մալյանով. Նիկոլ Փաշինյան

ԱԺ պատգամավոր Նիկոլ Փաշինյանը հուլիսի 17-ից հետեւել է «Սասնա ծռեր» ջոկատի գործողություններին, որոնք գրավել էին Էրեբունու ՊՊԾ-ն։ Նա դատապարտեց բռնությունները քաղաքացիների նկատմամբ, իրազեկեց, որ ինքն, առանց «Սասնա ծռեր» ջոկատի հետ  համաձայնեցնելու ոչ մի քայլ չի արել, նկարահանումներն անգամ համաձայնեցրել է նրանց հետ։ Նիկոլ Փաշինյանն ասաց, որ իրեն զանգահարել է Կարո Եղնուկյանը՝ կապված սննդի ապահովման հետ, ինքը համաձայնեցրել է խմբի անդամների հետ։ Նիկոլ Փաշինյանն անդրադարձավ այն մեղադրանքներին, որ իբր ինքը գնացել է Խորենացի փողոց՝ այնտեղ պրոցեսները ղեկավարելու նպատակով։ «Ես Խորենացի փողոցում գտնվում եմ այն ժամանակ, երբ կա դրա անհրաժեշտությունը, եւ կարծում եմ, որ կան մարդիկ այնտեղ, որոնք իմ համախոհներն են»,- ասաց Նիկոլ Փաշինյանը։ Անդրադառնալով այն տեղեկությանը, որ հնարավոր է իրեն խփեն, Նիկոլ Փաշինյանն ասաց, որ դա Նարեկ Մալյանն է տարածել, եւ ԱԱԾ-ն պետք է զբաղվի նրանով, կանչի-հարցաքննի։ Բանակցություններին անդրադառնալով էլ՝ Նիկոլ Փաշինյանը նշեց, որ ինքը բոլոր պաշտոնյաների հետ իր խոսակցությունների մասին տեղյակ է պահել հանրությանը, բանակցել է միայն սննդի եւ բռնության ենթարկվածների հարցերով։ Նիկոլ Փաշինյանն ասաց, որ Պավլիկ Մանուկյանն ու «Սասնա ծռեր» ջոկատի մյուս անդամները տեղյակ չեն, ռեալ պատկերացում չունեն իրավիճակի մասին, ինչը ուժային լուծման համար լայն դաշտ է ստեղծում։