Հաստատվել է Նիսի ահաբեկչության հետեւանքով բոլոր 84 զոհերի ինքնությունը

Քրեագետ-փորձագետները ճանաչել են բոլոր 84 մարդկանց ինքնությունը,  որոնք զոհվել էին հուլիսի 14-ին Նիսի Անգլիական ափին տեղի ունեցած ահաբեկչական ակտի հետեւանքով: Այս մասին հայտնել է Փարիզի դատախազությունը, որի վարույթում է գտնվում ահաբեկչության փաստով հետաքննությունը: «Ճանաչվել են ահաբեկչության հետեւանքով բոլոր 84 զոհվածները»,- նշված է դատախազության հայտարարության մեջ: Հիշեցնենք, որ հուլիսի 14-ին 30-ամյա թունիսցին բեռնատարով մխրճվել էր Նիսի կենտրոնում՝ Անգլիական ափին հավաքված մարդկանց բազմության մեջ: Վարորդը դիտավորությամբ ընթացել էր զիգզագաձեւ՝ ջանալով որքան հնարավոր է շատ մարդկանց ճզմել: Ավելի ուշ նա սպանվեց ոստիկանների հետ փոխհրաձգության ժամանակ: Ահաբեկչության հետեւանքով զոհվեց 84 մարդ, ավելի քան 100-ը վիրավորվեց: