Կրեմլում արձագանքել են հայաստանյան իրադարձություններին
Երևանի, Թուրքիայի և Ալմաթիի իրավիճակները չի կարելի նույնացնել: Այս մասին, ինչպես հայտնում է «Ինտերֆաքս»-ը, լրագրողների հետ զրույցում ասել է ՌԴ նախագահ Վլադիմիր Պուտինի մամուլի քարտուղար Դմիտրի Պեսկովը: «Թուրքիայում, Հայաստանում և Ղազախստանում տեղի ունեցած իրադարձությունները չի կարելի միակերպ որակավորել: Եթե մի դեպքում դա հեղաշրջման փորձ էր, ապա մյուսում` քրեական գործ», - «ՌԻԱ Նովոստի» գործակալության փոխանցմամբ` հայտարարել է Պեսկովը: Հիշեցնենք, որ հուլիսի 15-ին Թուրքիայում մի խումբ բարձրաստիճան զինվորականների նախաձեռնությամբ տեղի ունեցավ ռազմական հեղաշրջման չհաջողված (կամ՝ չավարտված) փորձ: Այն ճնշվեց ոստիկանության, կառավարությանը հավատարիմ մնացած զինվորական ստորաբաժանումների և «խաղաղ» բնակչության մի մասի ճնշման արդյունքում: Հուլիսի 17-ի առավոտյան Երևանում «Սասնա ծռեր» զինված խմբավորումը զենքի գործադրմամբ գրավեց ՀՀ ոստիկանության պարեկապահակային ծառայության գնդերից մեկը: Պատանդներ վերցնելով՝ զինված խռովարարները պահանջ են ներկայացրել ազատել Ժիրայր Սեֆիլյանին և պահանջել են նախագահի հրաժարականը:
Հետևեք մեզ Viber-ում
