Քուրդ զինյալները Թուրքիայում զորամաս են հողին հավասարեցրել

Թուրքիայի հարավ-արեւելյան Մարդին նահանգում քուրդ զինյալները հուլիսի 9-ին ռումբով բեռնված մեքենայով հարձակում են իրականացրել ժանդարմերիայի զորամասի դեմ, որի հետեւանքով սպանվել են բազմաթիվ թուրք զինվորականներ։ Թուրքական Sozcu կայքի փոխանցմամբ՝ PKK-ի (Քուրդիստանի բանվորական կուսակցություն) ռումոբ բեռնված մեքենայով հարձակում է իրականացրել Մարդինի Ջեվիզլի գյուղում գտնվող ժանդարմերիայի զորամասի դեմ։ Ռումբով բեռնված մեքենայի պայթյունից հետո քուրդ զինյալները տարբեր զինատեսակներից սկսել են գնդակոծել հողին հավասարեցված զորամասը։ Հարձակումից հետո միջադեպի վայր են մեկնել մեծ թվով մարտական ուղղաթիռներ, որոնք սկսել են ռմբակոծել քուրդ զինյալների գտնվելու հավանական վայրերը։ Թուրքական պաշտոնական աղբյուրները հաղորդում են 2 սպանված զինվորի մասին, սակայն քրդական աղբյուրները պնդում են, թե շտապօգնության մեքենաները մեծ թվով դիակներ են տարել հարձակման ենթարկված զորամասից։