Ողբերգական դեպք Վայոց Ձորի մարզում. 61-ամյա վարորդը տրակտորով գլորվել է ձորը և տեղում մահացել

Քիչ առաջ ողբերգական դեպք է տեղի ունեցել Վայոց Ձորի մարզում: Ժամը 18:50-ի սահմաններում Վայոց Ձորի մարզի Կեչուտ գյուցի բնակիչ, 61-ամյա Երեմ Եղիազարյանը Վայք քաղաքից դեպի Զառիթափ գյուղ տանող ճանապարահի «Զոմա» կոչվող հանդամասում` դաշտամիջյան հատվածում, իր վարած MTЗ 80 մակնիշի տրակտորով դուրս է եկել ճանապարհի երթևեկելի գոտուց և մոտ 40 մետր գլորվել ձորը: Ինչպես հայտնում է ֆոտոլրագրող Գագիկ Շամշյանը, վթարի հետևանքով վարորդ Ե. Եղիազարյանը տեղում մահացել է: Դեպքի վայր են ժամանել ճանապարհային ոստիկանության 2-րդ սպայական գումարտակի 6-րդ վաշտի 1-ին դասակի աշխատակիցները` վաշտի հրամանատարի տեղակալ Գեղամ Մարգարյանի, դասակի հրամանատար Կարեն Օհանյանի գլխավորությամբ: Այս պահին դեպքի վայրում աշխատում են Հայաստանի քննչական կոմիտեի Վայոց Ձորի մարզային քննչական վարչության քննիչները` վարչության պետ Ավագյանի գլխավորությամբ: Քննչական վարչության պետ Ավագյանի հանձնարարականով քննչական բաժնում հարուցվել է քրեական գործ` ՀՀ քր. օր.-ի 242 հոդվածի 2-րդ մասի հատկանիշներով: Ֆոտոլրագրողի տեղեկություններով` վթարի պատճառը եղել է նաև անձրևային եղանակը, քանի որ մահացածը գնացել է դաշտ` գյուղատնտեսական աշխատանքներ կատարելու, սակայն տեսնելով, որ անձրև է սկսել` վերադարձել է տուն, ինչը ողբերգական ավարտ է ունեցել: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: