ՀՀ-ն պետք է շարունակի խաղալ ԵՄ-ի և ԵԱՏՄ-ի բլոկերի մեջ.Ա.Նավասարդյան
Արտակարգ և լիազոր դեսպան Արման Նավասարդյանը լրագրողների հետ հանդիպմանը հայտնեց.«Ռուս-թուրքական հարաբերությունների զարգացումը դրական կամ բացասական որևէ ազդեցություն չի կարող ունենալ Հայաստանի վրա: Ընդհակառակը, կարծում եմ, որ գոնե սահմանի երկայնքով ապահովության, անվտանգության խնդիրն ավելի կուժեղանա, որովհետև եթե Ռուսաստանն ու Թուրքիան, բացի ամեն ինչից, անվտանգության հարցերի հետ պետք է շփվեն, տեռորիզմի դեմ պայքարեն, սահմանը պետք է, որ ավելի ապահով լինի: Ղարաբաղյան հարցում, դժվար թե, առաջխաղացում լինի, Թուրքիան չի փոխի իր դիրքորոշումն Ադրբեջանի հետ. կմնան նույն բարեկամական հարաբերությունները»:
«Կարող է մի փոքր ավելի ճկուն լինի Թուրքիան ԼՂՀ հարցերի ուսումնասիրման և հետագա զարգացման համար: Իմ կարծիքով՝ նվազում է Ադրբեջանի հնարավորությունները Ռուսաստանի հետ հետագա զարգացումների համար, որովհետև Բաքուն որքան էլ ճկուն քաղաքականություն վարի, չի կարող հավասար ուժերով խաղալ Անկարայի և Մոսկվայի միջև»,-ասաց Ա. Նավասարդյանը և հավելեց,որ ոչ մի լավ բան չի սպասում նաև ՀԱՊԿ-ի շրջանակներում, չնայած, նրա խոսքով, ՀԱՊԿ քարտուղար Բորդյուժայի հայտարարությունները Երևանում ավելի դրական էին հայկական կողմի համար, քան՝ կարելի էր սպասել:
«Նման պայմաններում Հայաստանի դիվանագիտությունը պետք է համակարգված մոտեցում ցուցաբերի: Հայաստանն, իմ կարծիքով, պետք է շարունակի խաղալ երկու բլոկների մեջ՝ ԵՄ-ի և ԵԱՏՄ-ի, որովհետև այստեղ մենք այլ ելք չունենք: Հայաստանի բոլոր հնարավորությունները խոսում են այն մասին, որ այստեղ կարող ենք շատ լուրջ դեր խաղալ, որովեհտև մեր գործոնները շատ ուժեղ են՝ մենք ունենք քրիստոնեական, եվրոպական արժեքներ, հանդիսանում ենք արևելյան քաղաքակրթության մասնիկը և, վերջին հաշվով, մենք ունենք շատ ուժեղ, հզոր ներուժ, որը կոչվում է Սփյուռք»,-ասաց Նավասարդյանը:
Հետևեք մեզ Viber-ում
