Բացառիկ հարցազրույց Լևոն Հայրապետյանի դստեր հետ. լուսանկարներ

Հայտնի գործարար եւ բարերար Լեւոն Հայրապետյանի դստեր՝ Զառայի կյանքում  հոր ձերբակալությունից հետո շատ բան փոխվեց: Աղջիկը վստահ է, որ հորը ձերբակալել են անհիմն, ինչպես որ հազարավոր հայեր, ովքեր՝ ի պաշտպանություն  ծնունդով արցախցի Լևոն Հայրապետյանի  կազմակերպեցին  ստորագրահավաք և  երթ: Զառան նույնպես մասնակցում էր դրանց և հիմա էլ երազում է հոր ազատության մասին: Wnews.am-ը հանդիպել և զրուցել է Լևոն Հայրապետյանի դստեր՝  Զառա Հայրապետյանի  հետ: Զառա, կպատմե՞ս քո մասին։ Քանի՞ տարեկան ես, ինչո՞վ ես զբաղվում։ 15 տարեկան եմ , սովորում եմ դպրոցում, ուսումնասիրում եմ լեզուներ, զբաղվում եմ նկարչությամբ, քանի որ ուզում եմ դառնալ դիզայներ: Ո՞վ է մանկության  տարիներին ավելի շատ  զբաղվել քո դաստիարակությամբ՝ մա՞յրդ , թե՞ հայրդ: Հիմնականում մայրիկս է զբաղվել իմ դաստիարակությամբ,  բայց հայրս էլ իր բացառիկ հայրենասիրությամբ մեծ ազդեցություն է ունեցել ինձ վրա: Լևոն Հայրապետյանը խի՞ստ հայր է: Այո հայրս շատ խիստ է, բայց, միաժամանակ, չափազանց բարի: Նրա դուստրը լինելը ի՞նչ պարտավորություններ է քո առջև դնում: Հորս դուստրը լինելը պարտավորեցնում է լինել շատ զուսպ և համեստ և, իհարկե լավ սովորել, որպեսզի հասարակությանը պիտանի լինեմ, ինչպես հայրս: Ի՞նչ կարեւոր խորհուրդ ես ստացել հորիցդ, որը հաճախ ես կիրառում։ Սիրել հայրենիքը և նվիրված լինել հայրենիքին: Նաև լինել ազնիվ: Քո կարծիքով ո՞րն է Լևոն Հայրապետյանին լավագույնս բնութագրող հատկանիշը: Հորս լավագույնս բնութագրում է բարությունը: Հայրդ բարերար է , ով բազմիցս օգնել է Արցախի ժողովրդին, ինքդ եղե՞լ ես այնտեղ: Ի՞նչ կպատմես Արցախի մասին: Իհարկե, ես ամեն տարի մեկնում եմ Արցախ՝ հպարտությամբ, Արցախն իմ տունն է: Շատ գեղեցիկ բնություն ունի և հարուստ է պատմամշակութային հուշարձաններով: Շատ եմ սիրում Վանք գյուղը, որը հորս միջոցներով վերածվել է դրախտավայրի: Հայրդ տանը խոսո՞ւմ էր իր գործերից: Չէր խոսում: Նա ընդհանրապես չի սիրում խոսել գործերի մասին, նա սիրում է գործել: Ի՞նչ փոխվեց քո կյանքում հորդ ձերբակալությունից հետո։ Այս երկու տարիների ընթացքում  ես կարծես ավելի մեծացա, հասկանցա, թե որքան անազնվություններ կան աշխարհում: Ե՞րբ ես վերջին անգամ զրուցել նրա հետ եւ ի՞նչ է քեզ ասել։ Ձերբակալվելուց հետո  հայրս ասաց, որ  ես շատ ուժեղ լինեմ ու որ ազնվությունը, միևնույն է, կհաղթի:  Ի՞նչ ես մտածում դու հորդ ձերբակալության մասին: Ես միայն կարող եմ ասել, որ անհիմն են մեղադրել հորս: Ի՞նչ մասին ես երազում։ Երազում եմ հայրիկիս ազատության մասին:   Նյութի աղբյուրը՝ Wnews.am