«Figaro». Էրդողանը բնապահպանության հետ կապված խնդիրներ ունի

Էրդողանը բնապահպանության հետ կապված խնդիրներ ունի, բայց փիլիսոփայության առումով ամեն ինչ կարգին է: Այդ մասին ասվում է թուրք նախագահի «դարի կառույցների» մասին ֆրանսիական «Figaro» թերթի տեսասյուժեում: Դրանցից մեկը Ստամբուլում խոշոր մզկիթն է: Այն կառուցել են Էրդողանի մտերիմ գործարարների նվիրատվություններով: Ավելորդ է ասել, որ նվիրատվություններն ուղեկցվել են հարկերի կրճատմամբ, ասված է ռեպորտաժում: «Երեւում է, Էրդողանի մտերիմ ընկերների գործերը լավ են: Մզկիթը 66 մլն դոլար է արժեցել: Վեճեր է առաջացրել նաեւ մզկիթի վայրը: Դա պահպանվող ճարտարապետական գոտի է: Այդ մասին են անհանգստանում նաեւ ճարտարապետական շրջանակները: Բայց մարդիկ հասկանում են, որ դժվար է Էրդողանին «ոչ» ասել, լինի դա մզկիթի շինարարություն թե ծխելը թողնելու խոստում, ինչպես որ 2015-ի օգոստոսին էր», - նշված է ռեպորտաժում: Հետագայում մեջբերվում է Էրդողանի զրույցը, որը հասարակ քաղաքացու ձեռքին մի տուփ ծխախոտ է տեսել: Նա մոտեցել է, ձեռքը դրել է նրա ուսին եւ ասել է. «Դու կթողնես ծխելը ճի՞շտ է»: «Այնուամենայնիվ դժվար է»: «Ոչինչ, բայց անհրաժեշտ է: Մենք կվերցնենք քո հեռախոսահամարը եւ քո ընտանիքի անդամների հեռախոսահամարը, որպեսզի պարզենք, թե արդյոք իրոք թողել ես ծխելը»: «Ես Գերմանիայում եմ ապրում»: «Ոչինչ, մեզ համար դժվար չէ զանգելը», - հավաստիացրել է Թուրքիայի նախագահը: Էրդողանը ճանապարհի կեսին կանգ չի առնում եւ իր նախագահական պալատի առումով: 2014 –ի աշնանն ավարտված շինությունն աշխարհի ամենախոշոր նախագահական պալատն է դարձել: 300 հազար քմ մակերեսով պալատը կառուցվել է Անկարայի մոտերքում անտառային զանգվածում: Երրորդ «դարի կառույցը» Ստամբուլի նոր օդանավակայանն է: Այն արդեն բնապահպանական կազմակերպությունների անհանգստությունն է առաջացրել, որովհետեւ պետք է տեղակայվի անտառային գոտում` Տերկոս լճի մոտ, որը Ստամբուլին ջուր մատակարարող վեց լճերից մեկն է: Էրդողանը բոլոր առարկություններին պատասխանել է. «Թզուկներին տրված չէ տեսնել նշանակալին, չնայած նրանց հանդեպ իմ ամբողջ սիրուն եւ առանց որեւէ ցանկության` վիրավորել նրանց»: «Չնայած բնապահպանության առումով գործերն այնքան էլ լավ չեն, փոխարենը փիլիսոփայության առումով Էրդողանի մոտ ամեն ինչ կարգին է», - հեգնում է թերթը: