Զանգվածային կրճատումներ`Ադրբեջանում

Մանաթի արժեզրկման հետեւանքով տնտեսական ճգնաժամում հայտնված Ադրբեջանի պետական կառույցներում զանգվածային կրճատումներ են սկսվել:

«Azərenerji» բաց բաժնետիրական ընկերությունը վերջին մեկ շաբաթվա ընթացքում կառույցի պահպանության համակարգից կրճատել է 900, տեխնիկական անձնակազմից` 250 հոգու: Սպասվում է, որ փետրվարի սկզբին պետական այդ ընկերությունից կրճատված աշխատակիցների թիվը կհասնի 3000-ի, ինչով 8000 հոգանոց ընկերության աշխատակիցների թիվը կհասցվի 500-ի:

Ընկերության ղեկավարությունը խիստ անհանգստացած է, որ աշխատակիցների դժգոհությունը կարող է մեծանալ, քանի որ «Azərenerji» -ի աշխատակիցները մինչ այժմ չեն ստացել դեկտեմբերի աշխատավարձը: Կայքը գրում է, որ զանգվածային կրճատումներ են սկսվել նաեւ պետական «Azərenerji» ճանապարհաշինական ընկերությունում: Սալեհ Մամեդովի` ընկերության նախագահ դառնալուց հետո կառույցի մեջ գտնվող 115-ից ավելի վարչությունների բոլոր աշխատակիցներից պահանջվել է աշխատանքից ազատվելու դիմում ներկայացնել: Կառույցի աղբյուրները հայտնել են, որ դա կապված է զանգվածային կրճատումներ սպասվելու հետ: Արդեն բացահայտ ասվում է, որ կառավարությունն առաջարկել է կրճատել կառույցի աշխատակիցների երկու երրորդը, որից հետո կառույցի մեջ մտնող վարչությունների թիվը պետք է հասցվի 40-ի: Դա կապվում է այն բանի հետ, որ առաջիկա տարիներին պետական բյուջեում ճանապարհաշինության համար նախորդ տարիների չափով փող չի հատկացվելու: Ընկերության ղեկավարությունը հույս ունի, որ աշխատանքից ազատվելու դիմումներ ձեռք բերելով, կարող է զերծ մնալ զանգվածային կրճատումների պատճառով աշխատակիցների հնարավոր դժգոհությունից, նշում է կայքը: