Օբաման մտադիր է ՆԱՏՕ-ին կոչ անել ուժեղացնել ԵՄ-ի հետ ռազմական համագործակցությունը. NYT

ԱՄՆ նախագահ Բարաք Օբաման մտադիր է հուլիսի 8-ին Վարշավայում կայանալիք ՆԱՏՕ–ի գագաթնաժողովում գործընկերներին կոչ անել ռազմական ոլորտում ավելի սերտորեն համագործակցել ԵՄ–ի հետ, գրում է The New York Times–ը՝ վկայակոչելով նախագահի աշխատակազմում իր աղբյուրները:Ինչպես հայտնել է պաշտոնյաներից մեկը՝ նման գործընկերությունն արդեն վաղուց ԱՄՆ նպատակն է, սակայն ԵՄ-ից Մեծ Բրիտանիայի դուրս գալը այն դարձնում է ավելի հրատապ։ Մասնավորապես, ՆԱՏՕ-ն և ԵՄ-ն կարող են համագործակցել կիբերհարձակումների հակազդման, զորավարժությունների համակարգման և Միջերկրականի կենտրոնական մասում պարեկման հարցերում։ Նշվում է նաև, որ եվրոպացի դիվանագետները Ֆրանսիաից և Գերմանիայից ակնկալում են ավելի սերտ ռազմական ինտեգրման մասին առաջարկ։