Թուրքիան` ռուս զբոսաշրջիկների սիրելի վայր
Դեպի Թուրքիա ուղեգրերի վաճառքի մեկնարկից երեք օր անց այդ ուղղությունը ռուսաստանցիների ամենասիրելի ուղղություններից մեկն է դարձել, գրում է «Коммерсантъ»-ը: Պարբերականի տվյալներով՝ վաճառված ուղեգրերի 35 տոկոսը բաժին է ընկնում Ռուսաստանի համար վերաբացված հանգստավայրերին: Տուրօպերատորները հայտարարել են չարտերային ծրագիրը վերականգնելու պատրաստակամության մասին, սակայն դա հնարավոր կլինի միայն «Ռոսավիացիայի» թույլտվությունից հետո: Զբոսաշրջային գործակալությունների հիմնական խնդիրն այժմ կարող են դառնալ այն ճանապարհորդները, որոնք որոշել են վերաամրագրել իրենց հանգիստը Թուրքիայում՝ հրաժարվելով այլ ուղղություններից: Տուրօպերատորների ասոցիացիայի գործադիր տնօրեն Մայա Լոմիձեն այդ իրավիճակը սպասելի է համարում: Սակայն նա նշում է, որ չնայած հարցումների մեծ քանակին, վերաամրագրված տուրերի թիվը նվազագույնը կլինի: «Հաճախորդները տուգանքների վրա գումարներ կծախսեն, ինչը ձեռնտու չէ»,-պարզաբանել է նա: Հուլիսի 2-ին Լոմիձեն հաղորդել էր, որ դեպի Թուրքիա ուղեգրերի պահանջարկը 10 անգամ գերազանցում է իրական առաջարկի ծավալները: «Մարդիկ, սակայն, դեռ անվտանգության երաշխիքներ չեն ստացել, և տուրփաթեթների գներն էլ կանոնավոր ավիափոխադրումներով դեռ շարունակում են բավական բարձր մնալ»,-նշել է նա:
Հետևեք մեզ Viber-ում
