Մեր միակ ձեռքբերումն այն էր, որ աղետի հետևանքով զոհեր չեղան.քաղաքապետ
«Հնարավոր էր ես չփրկվեի սելավի ժամանակ, եթե իմ արձագանքին չպատախաներ քաղաքապետը: Հենց առաջին արձագանքս ուղղված է եղել քաղաքապետին, ով փրկարար ջոկատ ուղարկեց, և կարողացան ինձ տանից հանել: Ես շատ շնորհակալ եմ, որ կենդանի եմ մնացել, վարչապետն էլ եկավ տեսավ ու ինձ տուն է խոստացել»,- լրագրողների հետ հանդիպմանն ասաց Արթիկի բնակչուհի Դուսակ Հարությունյանը: Արթիկում տեղի ունեցած աղետալի ջրհեղեղից հետո բնակիչների խնդիրները շարունակում են մնալ անլուծելի, չնայած հնչեցվող խոստումներին` նրանց տրամադրվող գումարները չեն բավարարում բնակարաններն «ուշքի բերելու» համար: « Մեր միակ ձեռքբերումն այն էր, որ աղետի հետևանքով զոհեր չեղան :Մանկապարտեզում 20-ից ավելի երեխաներ կային, և կարող էր աղետն ունենալ անդառնալի հետևանքներ: Ես բազմիցս հայատրարել եմ և մնում եմ նույն կարծիքին, որ աղետի հիմնական պատճառը առատ տեղումներ էին»,-ասաց քաղաքապետ Արսեն Աբրահամյանը: Քաղաքապետը նաև նշեց, որ այժմ կատարվում են անհրաժեշտ աշխատանքեր վիճակը բարելավվելու համար: Նրա խոսքերը հաստատեց Տարածքային կառավարման և զարգացման նախարարության վարչական հսկողության և համայնքների հարցերով վարչության պետ Արթուր Սողոմոնյանը, ում փոխանցմամբ` այս պահին Արթիկում այնքան տեխնիկա կա, որ այդ ուղղությամբ անգամ կատակներ են հնչում: Արթիկի մեկ այլ բնակիչ` Լյովա Մոռոյանն էլ ասաց, որ վարչապետը, տեսնելով իր տունն, ասել է, որ այնտեղ բնակվելն ուղղակի հնարավոր չէ և հրահանգել է իրեն տուն տրամադրել. «Երկու օր քնել եմ իմ տան տանիքում. ուրիշ բան չեմ պահանջում, մենակ տուն եմ ուզում, որ կարողանամ ապրել»: Բնակիչն անկեղծացավ ու լրագրողներին հայտնեց, որ իր հագուստ անգամ վերցրել է եղբորից. աղետից հետո տանը ոչինչ չի մնացել:
Հետևեք մեզ Viber-ում
