Քեմերոնը`հրաժարականի մասին

Բրիտանիայում հանրաքվեի արդյունքներով հաղթել են ԵՄ կազմից երկրի դուրս գալու կողմնակիցները, հայտնում է BBC-ն: Նշում են, որ ԵՄ կազմից Մեծ Բրիտանիայի դուրս գալու կողմնակիցները հաղթահարել են 16.7 մլն ձայնի շեմը: Մեծ Բրիտանիայի դուրս կգա Եվրամիությունից՝ այդ միությունում 43 տարվա անդամակցությունից հետո: Բրիտանացիների 52 տոկոսը կողմ է քվեարկել ԵՄ-ից Մեծ Բրիտանիայի դուրս գալուն, իսկ դեմ՝ 48 տոկոսը: Երեկ կայացած հանրաքվեի արդյունքների հրապարակումից հետո Մեծ Բրիտանիայի վարչապետ Դևիդ Քեմերոնը հայտարարել է, որ երկրին նոր ղեկավարներ են հարկավոր և խոստացել է 3 ամսից հրաժարական ներկայացնել, հայտնում է BBC-ն: Նա նաև հայտարարել է, որ հանրաքվեի արդյունքները ոչ մի կտրուկ փոփոխություն չեն բերի բրիտանացիների կյանքում: «Կարծում եմ, որ այս երկրին հարկավոր է նոր կառավարություն: Ես կանեմ հնարավոր ամեն ինչ, որպես վարչապետ, որպեսզի բալանսավորեմ այդ նավը մոտակա շաբաթներին և ամիսներին, սակայն չեմ կարծում, թե ինձ համար ճիշտ կլինի լինել այդ նավի նավապետը նրա հետագա նշանակետին հասնելու համար»,- հայտարարել է Քեմերոնը: Նրա խոսքով՝ պետք է անել այնպես, որ երկրի նոր վարչապետը նշանակվի մինչև հոկտեմբեր՝ մինչ պահպանողականների համաժողովի մեկնարկը: Մեծ Բրիտանիայում երեկ կայացած հանրաքվեի արդյունքով՝ երկրի բնակիչների մեծ մասը քվեարկել է ԵՄ շարքերը լքելու օգտին: