Ինջիրլիք ավիաբազան փակ է գերմանացիների համար

Անկարան Գերմանիայի պաշտպանության նախարարության պետական քարտուղար Ռալֆ Բրաուկզիպեի գլխավորած գերմանացի պատգամավորների պատվիրակությանը թույլ չի տվել այցելել թուրքական Ինջիրլիք ավիաբազա, հայտնում է Spiegel-ը: Բունդեսվերի գեներալ-լեյտենանտ Դիտեր Վարնեկեն ռազմական հանձնաժողովի շրջանակներում պարբերականին հայտնել է, որ Անկարան որպես մերժման պատճառ բերել է Գերմանիայի կողմից ընդունված 1915 թվականի Օսմանյան կայսրությունում իրականացված Հայոց ցեղասպանության ճանաչման բանաձևը: Գերմանիայի ՊՆ պաշտոնական ներկայացուցիչը հաստատել է, որ Անկարան չի համաձայնեցրել գերմանական պատվիրակության այցի պլանը: «Այդ մասին թուրքական ԱԳՆ-ն հայտնել է գերմանացի դեսպանին»,- ճշտել է նախարարության ներկայացուցիչը: Նա ավելացրել է, որ թուրքական իշխանությունների գրավոր բացատրությունը Գերմանիայի պաշտպանության նախարարությունը դեռևս չի ստացել: Նախապես գերմանական պատվիրակությունը պլանավորել էր այցելել հուլիսի կեսերին, որպեսզի ծանոթանար գերմանացի զինծառայողների վիճակին, ովքեր մասնակցում են ԴԱԻՇ զինյալների դեմ գործողություններին: Ինջիրլիք բազայից բացի, պլանավորվել է այցելել Իրաքի հյուսիս և Քուվեյթում ու Քաթարում ԴԱԻՇ-ի դեմ կոալիցիայի գլխավոր շտաբ-բնակարաններ: Այժմ պատվիրակությունը ստիպված պետք է հրաժարվի թուրքական ավիաբազայում կանգառից: Ինչպես գրում է գերմանական պարբերականը, գերմանացի քաղաքական գործիչներին այդ մերժումը արդեն երկրորդ «դիվանագիտական ապտակն» է: Բունդեսթագում բանաձևի ընդունումից անմիջապես հետո Անկարան չեղյալ է հայտարարել Ինջիրլիք ավիաբազայում գերմանացի լրագրողների այցը` իբր ավիաբազայում անվտանգության նկատառումներից ելնելով: