ԵՄ-ից Բրիտանիայի դուրս գալը կբարդացնի ապագա սերունդների կյանքը.Քեմերոն
Մեծ Բրիտանիայի վարչապետ Դևիդ Քեմերոնը բրիտանացիներին դարձյալ կոչ է արել քվեարկել Եվրամիության երկրներում անդամակցության պահպանման օգտին՝ դա բացատրելով ապագա սերունդների բարեկեցությամբ: «Կան որոշակի ռիսկեր մեր ընտանիքների համար, և մենք չենք կարող դրան գնալ: Ապագա սերունդների համար ապրելն ավելի կդժվարանա, եթե մենք քվեարկենք միությունից դուրս գալու օգտին: Հանուն ձեզ, հանուն ձեր ընտանիքների քվեարկեք անդամակցության պահպանման օգտին»,- ասել է Քեմերոնը՝ ելույթ ունենալով Լոնդոնի իր նստավայրում: «Ես կցանկանայի դիմել իմ սերնդի բոլոր մարդկանց: Ես գիտեմ, որ Եվրոպայի կառուցվածքը կատարյալ չէ, սակայն, հավատացեք ինձ, ես հասկանում եմ ու տեսնում ձեր անհանգստությունը: Հենց այդ պատճառով էինք մենք վարում բանակցություններ ԵՄ իշխանությունների հետ մեր հատուկ կարգավիճակի վերաբերյալ: Մենք ստացանք լավագույնը մեզ համար: Սակայն հիշեք, որ դուք չեք կարող չեղյալ հայտարարել ընդունված որոշումը: Եթե քվեարկեք դուրս գալու օգտին, դա կլինի վերջնական որոշում: Հետդարձ չի լինի»,- ասել է Քեմերոնը: Քեմերոնը դիմել է բրիտանացիներին համաժողովրդական հանրաքվեից 2 օր առաջ: Հունիսի 23-ին բրիտանացիները պետք է պատմական ընտրություն կատարեն՝ կմնա՞ արդյոք Բրիտանիան ԵՄ կազմում, թե՞ դուրս կգա միությունից:
Հետևեք մեզ Viber-ում
