Իլհամ Ալիևն այցելել է Նարդարան

Ադրբեջանի նախագահ Իլհամ Ալիևն այցելել է Բաքվից 25 կիլոմետր հեռավորության վրա ընկած Նարդարան, որտեղ 2015 թվականի նոյեմբերի 26-ին բախումներ էին տեղի ունեցել իրավապահների ու հավատացյալների միջև,  հայտարարել է Կովկասի Մուսուլմանների վարչության նախագահ, շեյխ ուլ իսլամ Ալլահշուքյուր Փաշազադեն՝ ելույթ ունենալով Կրոնական կազմակերպությունների հետ աշխատանքային հարցերով պետական հանձնաժողովի 15-ամյակին նվիրված միջոցառման ժամանակ: Ադրբեջանական APA լրատվական գործակալության փոխանցմամբ՝  Փաշազադեի խոսքով՝ Ալիևը այցելել է ավանի տարածքում գտնվող մզկիթներ: Նա ընդգծել է, որ ներկայումս ամեն ինչ նորմալ է այնտեղ, և չկա որևէ դիմակայություն: «Պետության ղեկավարը հանդիպել է Նարդարանի բնակիչների հետ. նա մշտապես ուշադիր է բնակչության, մասնավորապես հավատացյալների խնդիրների հանդեպ: Այդ հանդիպումն օրինակելի է: Մենք նույնպես նախագահի հետ եղել ենք Նարդարանում»,- ասել է Փաշազադեն: