Թուրքիան գազի ներկրման ցուցանիշով զբաղեցրել է երրորդ տեղը

TRT Haber հեռուստաալիքի փոխանցմամբ՝ Թուրքիան նախորդ տարվա արդյունքներով գազի ներկրման ցուցանիշով եվրոպական երկրների թվում զբաղեցրել է երրորդ տեղը: Խոսքը խողովակաշարերի միջոցով բնական գազի և հեղուկացված գազի ներկրման մասին է: Այդ մասին նշված է BP ընկերության «Համաշխարհային էներգետիկայի վիճակագրություն» զեկույցում: Դրանում նշված է, որ 2015 թվականին բնական գազի գլոբալ առևտրի ծավալը, 2014 թվականի համեմատ, աճել է 4 տոկոսով՝ հասնելով 704 միլիարդ խորանարդ մետրի: Զեկույցի համաձայն՝ Թուրքիան խողովակաշարերով գազի առևտուր իրականացնելու հարցում Երոպայում զբաղեցրել է երրորդ տեղը՝ Գերմանիայից ու Իտալիայից հետո: Գերմանիան նախորդ տարի խողովակաշարերով ներկրել է 104 միլիարդ խորանարդ մետր գազ, որով և նա զբաղեցրել է առաջին տեղը Եվրոպայում: Երկրորդ տեղում Իտալիան է՝ 50 միլիարդ խորանարդ մետր, իսկ Թուրքիայի ցուցանիշը կազմել է 39.7 միլիարդ խորանարդ մետր: