«Գազպրոմբանկ»-ն Ադրբեջանում 5 մլրդ դոլար կներդնի. SOCAR-ի նախագահ

Ռուսաստանի Դաշնության «Գազպրոմբանկ»-ը Ադրբեջանում գազավերամշակման նախագծի ֆինանսավորման մեջ կմասնակցի 5 մլրդ դոլար ներդրումային չափաբաժնով: Այս մասին, ինչպես հաղորդում է «Արմենպրես»-ը` վկայակոչելով ՏԱՍՍ-ը, Սանկտ Պետերբուրգում միջազգային տնտեսական համաժողովի շրջանակում լրագրողներին հայտարարել է Ադրբեջանի պետական նավթային ընկերության ` SOCAR-ի նախագահ Ռովնագ Աբդուլլաեւը: Նշվում է, որ մասնավորապես, համաժողովի շրջանակում այդ նախագծի իրականացման համար SOCAR-ի եւ «Գազպրոմբանկ»-ի միջեւ հուշագիր է ստորագրվել: Պատասխանելով ռուսաստանյան բանկի կողմից նախագծի ֆինանսավորման ծավալի մասին լրագրողի հարցին՝ SOCAR-ի նախագահ պատասխանել է. «5 մլրդ դոլարի կարգի»: Նշվում է, որ նախագծի ֆինանսավորմանը կարող են մասնակցել իտալական ընկերությունները եւս: Ռովնագ Աբդուլլաեւի խոսքով` Ադրբեջանում գազավերամշակման համալիրի շինարարությունը կսկսվի եկող տարի: