Մեքսիկայում ուսուցիչների և ոստիկանության միջև բախումներ են սկսվել. կան զոհեր

Մեքսիկայի հարավում առնվազն 3 մարդ է զոհվել ցույցի դուրս եկած ուսուցիչների և ոստիկանության միջև բախումների ժամանակ։ Մոտ 45 մարդ վնասվածքներ է ստացել։ Այս մասին հայտնում է BBC-ն։ Դեպքը տեղի է ունեցել Օահակա նահանգում, որտեղ անցած շաբաթ կոռուպցիայի մեղադրանքով ձերբակալվել են կրթության ոլորտի աշխատողների արհմիության երկու առաջնորդներ։ Վրդովված ուսուցիչները ձերբակալությունները համարել են քաղաքականապես մոտիվացված և փակել ավտոճանապարհները՝ պահանջելով ազատ արձակել ակտիվիստներին։ Արհմիության անդամների գործողությունները կաթվածահար են արել երկրի հարավի տրանսպորտային երթևեկությունը։ Մահվան դեպքերը գրանցվել են, երբ ոստիկանությունը փորձել է մաքրել ճանապարհները պատնեշներից և հեռացնել ցուցարարներին։ Ինչպես հայտնում են իշխանությունները՝ անհայտ գրոհայինները երկու կողմից կրակ են բացել՝ առաջացնելով քաոս և խուճապ։