Հայկ Խանումյանն ու Բակո Սահակյանը հանդիպել են

ԼՂՀ ԱԺ պատգամավոր Հայկ Խանումյանը, որ հունիսի 6-ին անհայտ անձանց կողմից Ստեփանակերտի հրապարակից առեւանգվել ու ծեծի էր ենթարկվել, հավանաբար երկուշաբթի աշխատանքի կգնա: Երեկ նա նախագահական նստավայրում հանդիպել է ԼՂՀ նախագահԲակո Սահակյանին: Մեզ հետ զրույցում Խանումյանն ասաց, որ Սահակյանը կրկնել է իր մտահոգությունները, դատապարտել դեպքը եւ հավաստիացրել, որ մեղավորները կպատժվեն: Մեղավորների պատժվելու մասով Խանումյանը մի փոքր դժգոհություն ունի. նա կարծում է, որ առկա փաստերի պայմաններում կասկածյալների ու ձերբակալվածների շրջանակը ավելի մեծ պետք է լիներ: Հիշեցնենք, որ թեեւ Հայկ Խանումյանը իր ցուցմունքում պնդել է, որ 20 մարդ է իրեն ծեծել, նրանցից 7-ի տվյալները տրամադրել է ոստիկանությանը, սակայն դեպքից 10 օր անց ձերբակալվածներն ընդամենը 3-ն են: Երեկ ձերբակալվել է ՀՀ Երեւան քաղաքի բնակիչ, աշխարհազորային՝ 1968թ. ծնված Էրիկ Ռադիոնի Պողոսյանը։ Հունիսի 9-ին ձերբակալվել, ապա կալանավորվել էին եւս երկու հոգի՝ Ստեփանակերտի բնակիչներ, աշխարհազորայիններ՝ 1977թ. ծնված Միքայել Միքայելի Սահակյանը եւ 1968թ. ծնված Սերգեյ Գեորգիի Ավանեսյանը: Հայկ Խանումյանը մեզ հետ զրույցում ասաց, որ կալանավորվածների ու ձերբակալվածի հետ առերեսում եւ ճանաչում դեռ տեղի չի ունեցել, ինքն ընդամենը լուսանկարներով նայել է ու ճանաչել: «Ճանաչման պաշտոնական պրոցես չի եղել, բայց կալանավորվածները համապատասխանում են նրանց, ովքեր ինձ վրա հարձակվել են: Ֆոտոներն ուսումնասիրելուց այդպիսի համոզման եկա»,- ասաց պատգամավորը: Օրերս Խանումյանը դժգոհություն էր հայտնել նախաքննության ընթացքից: Այսօր մեզ հետ զրույցում ասաց, որ չի ցանկանում ավելին ասել, ու հորդորեց սպասել նախաքննության ընթաքին: «Գործողություններ են ընթանում, տեսնենք վերջում ինչ դուրս կգա: Նոր ձերբակալությունների հարցում հավանաբար ինչ-որ խոչընդոտներ կան օբյեկտիվ պատճառներից ելնելով, տեսնենք: Չեմ ուզում մանրամասնել, որովհետեւ միգուցե իր մեջ նապաքննական գաղտնիք է պարունակում»,- ընդգծեց նա: Հետաքրքրվեցինք նաեւ, թե արդյո՞ք հիվանդանոցից հետո զրուցել է ԼՂՀ ՊԲ նախկին հրամանատար Սամվել Բաբայանի հետ: «Ոչ, հետո ինքը տարբեր գործերով եղել էր Հայաստանի տարբեր շրջաններում, երբ գա՝ կզրուցենք»,- պատասխանեց Խանումյանը: Հիշեցնենք, որ Հայկ Խանումյանի առեւանգման ու ծեծի  դեպքը տեղի ունեցավ Սամվել Բաբայանին ՊԲ հրամանատար նշանակելու պահանջով նրա մասնակցությամբ ԼՂՀ նախագահի նստավայրի մոտ անցկացված բողոքի ակիցայից հետո: Չնայած սրան, հիվանդանոցում Խանումյանին տեսակցելուց հետո Սամվել Բաբայանը հայտարարեց, որ Խանումյանը ղալաթ է արել, ինքը չի ուզում ՊԲ հրամանատար դառնալ: Ծեծի հետեւանքով կոտրվել էին պատգամավորի 3 կողոսկրերը, այտոսկրը, քիթը, 2 ողերի ելունները: armtimes.com